«Ակօս»ի նախկին խմբագրատունը վերածուեցաւ յիշողութեան վայրի։ Երկարատեւ աշխատութիւնները գրեթէ հասած են աւարտին եւ վայրը 23-24 Ապրիլ թուականներուն հիւրընկալեց բազմաթիւ այցելուներ։
Հրանդ Տինքի սպանութենէն ետք Սեպաթ Ափարթման շէնքի առաջին յարկին գտնուող խմբագրատունը երկար ժամանակ ուխտավայրի մը վերածուած էր Պոլիս ժամանող բոլոր հայերուն համար։ Այցելուներ իրենց օրացոյցին մէջ յատուկ ժամ կը ճշդէին այցելելու համար Հրանդի երբեմնի աշխատավայրը։ Կը նկարուէին անոր գրասենեակին մէջ, իբրեւ թանկագին յիշատակ։ Այսօր խմբագրատունը փոխադրուած է երբեմնի Անարատ Յղութիւն վարժարանի շէնքը եւ նախկին խմբագրատունն ալ վերածուած է յիշողութեան վայրի։ Այս առումով բաւական խտացեալ աշխատութիւն տարուեցաւ, ուսումնասիրուեցան աշխարհի տարբեր երկիրներու մէջ նման նպատակ հետապնդելով հիմնուած վայրերը եւ այդ օրինակներու հիման վրայ այժմ իր դռները բանալու կը պատրաստուի Հրանդ Տինքի ձօնուած այս վայրը եւս։
Հրանդ Տինք Հիմնարկը մեծ աշխատանք վատնեց այս կառոյցը պատշաճ կերպով ձեւաւորելու համար։ Առաջին այցելուներու վկայութեամբ յաջողած էր նախատեսուած նպատակը, քանի որ հոն կը շնչէր անցեալի բազմաթիւ ապրումներ։ Ինչպէս վայրին անունը բազմաթիւ մանրամասնութիւններ եւս ներշնչուած էին Հրանդ Տինքի յօդուածներէն։ Օրինակի համար Հրանդ Տինքի մեծ անմիջականութեամբ նկարագրած եւ 12 Սեպտեմբերի զինուորական հարուածի դաժանութիւնները նկարագրող «Զուգարանի երգչախումբ» յօդուածը ապրումի մը վերածուած էր շնորհիւ կատարուած տեղադրութեան։ Խցիկէ մը աւելի փոքր տարածքի վրայ այցելուներ Հրանդի ձայնով կը լսէին այդ յօդուածի բովանդակութիւնը։ Անդին Հրանդի սպանութենէն ետք մեկնարկող դատական գործողութիւնը նոյնպէս կը ցոլացնէր դատավարութեան ամբողջ գործընթացը տեսանիւթերու գործածութեամբ։ Յատուկ էկրանի մը վրայ հաւաքուած էր «Ակօս»ի հիմնարկութենէն մինչեւ Հրանդի սպանութեան հասնող ժամանակահատուածի «Ակօս»ի համարներու հաւաքածոն։ Երբեմնի պատշգամը, որ երկար ժամանակ լեցուն էր «Ակօս»ի հին համարներով այժմ ձեւաւորուած է արուեստագէտ Սարգիսի կողմէ եւ ցնցիչ պատգամներ կը փոխանցէ այցելուներուն։ Ծանօթացման ժողովի ընթացքին Նայաթ Քարաքէօէ, Սիպել Ասնա եւ Սարգիս բազմաթիւ տեղեկութիւններ փոխանցեցին, թէ կատարուած աշխատութեան եւ թէ մտայղացումներու մասին։
Ռաքէլ Տինք այս առթիւ յայտնեց թէ առանց մոռնալու կ՚ուզենք այս ոճիրը մարդասիրական նպատակի մը համար օգտագործել։ «Յետ այսու թող չփորձեն մոռանալ։ Ան միշտ հոս է եւ մեր աչքերուն պիտի նայի։ Շնորհակալ եմ որ այս պահուն հոս էք»։ Իսկ Սիպել Ասնա պատմեց թէ նման վայրի մը կառուցման միտքը առաջին անգամ արտասանուեցաւ ակադեմական Այշէկիւլ Ալթընայի կողմէ Հրանդ Տինք հիմնարկի ժողովներէն մէկուն ընթացքին։ Ալթընայ թուեց աշխարհի վրայ յիշողութեան վայրի գործադրութեան օրինակներ եւ խորհուրդ տուաւ, որ մենք ալ կրնանք նմանը կառուցել այստեղ, այս տարածքին մէջ։ Իսկ Նայաթ Քարաքէօսէ պատմեց թէ այցելած են 15 երկիրներու մէջ աւելի քան 80 յիշողութեան վայրեր եկ օգտուած են անոնց փորձառութենէն։ «Ենթագիտակցութեան մէջ ունէինք կարեւոր հարցադրում մը։ Ճիշդ է որ այստեղ ողբերգութիւն մը ապրուեցաւ, բայց այս վայրը լրագրողի մը ստեղծագործած տեղն էր։ Ուրեմն ստիպուած էինք դէպի ապագայ հայցող վայր մը պատրաստելու»։ Քարաքէօսէ յայտնեց թէ այս վայրը ձեւաւորուած է բազմաթիւ մարդկանց խորհուրդները եւ առաջարկները մէկտեղելով։
