Մօտ մէկ ժամ Սամաթիա Ս. Յովհաննէս լուսաղբիւրի մէջ Ս. Պատարագի այս հրեշտակներուն ալ մասնակցութեամբ երգուած շարականին բացատրութիւնը մեզի սորվեցնող այդ օրերու վարդապետը այսօր չկայ։ Ան մեկնեց շատ սիրելի Հօր քով որ իր կեանքը նուիրած էր Անոր։ Ա.Տ. Մեսրոպ Պատրիարք հօր մահուան գոյժը երբ առի անգամ մը եւս սպասուած լուրին իրականութեան մէջ անպատրաստ ըլլալնիս մէջտեղ ելաւ։
Մի առ մի աչքիս առջեւէն անցաւ Սրբազան հօր Սամաթիա գալուստը որ Թաղման Արարողութիւնն էր եւ ցրուած ժողովուրդը հաւաքելու համար Հոգելոյս Շնորհք Պատրիարք հօր հետ միասին կատարած գործունէութիւնները, մանուկներու եւ երիտասարդներու յատուկ աշխատանքները, ժողովուրդի բոլոր զաւակներուն տուները կատարած այցելութիւնները....։
Որ մէկը յիշեմ այդ երանելի օրերէն։ Անակնկալ այցելութիւնները, մեր դասերը, ժամերով երգի մը վրայ կատարուած աշխատանքը, մեր տան երեց զաւակ կոչումը, մեր երախաներուն մկրտութիւններուն սիրով մասնակցութիւնը, քրոջս յուղարկաւորութեան օրը մեզ հետ աչերէն իջնող մարգարիտները ...
Սրբազան Հայր մենք ձեզ ինչո՞ւ շատ սիրեցինք գիտէք։ Ձեր այո՛ն այո՝ ո՛չը ոչ էր։ Նախ առանց դասակարգի զատորոշումով ժողովուրդի մէջը մտաք։ Ծրագրուած աշխատանքներով մեր պապերուն պէս ժողովուրդի իրաւունքներուն համար աշխատեցաք։ Դուք մեզի լաւ օրինակ մը եղաք շնորհակալ ենք։
Սիրելիներ հոգեւոր եղբայր մը կորսնցնելու հոգեկան ցաւին մէջ այսօր երբ ետ կը նայիմ, օրինակներէն լաւ օգտագործուինք կ՚ըսեմ։ Սրբազանը ահա այդ օր հանգիստ կ՚ըլլայ եւ անուշիկ ժպիտով մեզի կը խնդայ։
Սրբազան հանգիստ հոգւոյդ, հողդ թեթեւ ըլլայ։
Առաջին աշակերտներէդ
Հռիփսիմէ Արզուման Մէյտան
