Ժողովուրդներու ժողովրդավարութեան կուսակցութեան Տիյարպէքիրի պատգամաւոր Կարօ Փայլան Զբօսաշրջութեան նախարարութեան ելմտացոյցի քննարկման նիստին ներկայացաւ խիստ էական ելոյթով մը։
Փայլան Խորհրդարանը մեղադրեց իր ազգային միանշանակ դիրքորոշման առումով։
«Նախապէս ելոյթ ունեցող բոլոր կուսակցութիւններու ներկայացուցիչները խօսեցան –թուրք- սահմանումով։ Անոնք մերթ արտայայտուեցան Քէրքուքի թուրքերու, մերթ Ղրիմի թուրքերու, մերթ Պալգանեան երկիրներու ցեղակիցներու եւ մերթ ալ Ույկուր թուրքերու խնդիրներուն։ Նիւթական աղբիւրներ պահանջեցին –Թուրք լեզուական կաճառի-, -Թուրք պատմական կաճառի- համար։ Ես որպէս Թուրքիոյ քաղաքացի հայազգի պատգամաւոր, առարկութիւն չունիմ այս պահանջներուն դէմ։ Իմ առարկութիւնը նախապէս ելոյթ ունեցող մօտ 50 պատգամաւորներէն ոչ մէկուն հայ չըսելուն, քիւրտ կամ ասորի կամ լազ չըսելուն մասին է։ Կը վերանայ լազերէնը, կը վերանայ արեւմտահայերէնը, չերքէզերէնը։ Ինչո՞ւ համար ձեզմէ մէկը այս խնդիրներով չէ մտահոգուած։ Միթէ այս բոլորը մեր երկրի հարստութիւնները չե՞ն։ Ուրֆայի մերձաւոր Կէօպեքլիթեփէ պատմական բնակավայրը ունի 12 հազար տարիներու անցեալ։ Այդտեղի պեղումներէն յայտնաբերուած ոսկորներու ՏՆԱ-ի ստուգումները ամբողջովին կը համապատասխանեն աւանի այսօրուայ բնակիչներուն հետ»։
