Պատրիարքարանի Փոխանորդ սրբազանի նախաձեռնութեամբ կազմուած Խորհրդակցական մարմինը իր վերջին նիստին որոշեց դարձեալ շարժման անցնիլ համայնքային հաստատութիւններու վարչութիւններու ընտրութիւնը ապահովելու համար։
Ինչպէս նախապէս ալ ըսուած էր, կառավարութիւնը արգելք եղած էր բացի հանգստեան կոչուած Մեսրոպ Բ.-ի դէմ նոր պատրիարք մը ընտրելու գործընթացէն, նաեւ համայնքային հաստատութիւններու վարչութիւններու ընտրութեան խնդրին։ Եթէ պատրիարքական ընտրութեան արգելքը կը պատճառաբանուէր Հայ Առաքելական եկեղեցւոյ ընդունուած կանոնով, ըստ որու պատրիարքները պաշտօնի կը ձեռնարկեն անժամանակ կերպով, այսինքն ցկեանս, հաստատութիւններու վարչութեան ընտրութիւնն ալ չէ իրականացած նոր կանոնագրի մը պատրաստութեան պատրուակով։
Թէ ընտրուած պատրիարքի բացակայութիւնը եւ թէ համայնքային հաստատութիւններու վարչակազմին չնորոգուիլը ալ աւելի կը ծանրացնէ պոլսահայ հասարակութեան խնդիրները։ Նշանակուած փոխանորդները չեն կրցած ապահովել ընտրուած պատրիարքի մը հեղինակութիւնը։ Միւս կողմէ օրինական աշխատանքի շրջանը բոլորած վարչայիններն ալ դատապարտուած մնացին ծանր պատասխանատուութիւններ ստանձնելու։
Խորհրդակցական մարմնի անդամները որոշած են Սուրբ Ծննդեան տօնէն անմիջապէս ետք ժամադրութիւն մը ապահովելով այցելել մայրաքաղաք եւ լուծումներ որոնել այս անելի մատնուած հանգոյցը լուծելու համար։
