«Կէզի» զբօսայգիի դէպքերէն հինգ տարի ետք Հանրապետութեան նախագահ Ռեճեփ Թայյիպ Էրտողանի խիստ քննադատական պնդումները պատճառ դարձան, որ դատական մարմինները դարձեալ օրակարգի բերեն հինգ տարի առաջուայ անցուդարձերը։ Գործատէր եւ հասարակական կազմակերպութեան վարիչ Օսման Քաւալա, աւելի քան մէկ տարի է, որ ձերբակալուած է եւ տակաւին իր դէմ ամբաստանագիր մը չէ պատրաստուած։ Սակայն պաշտօնական ամբաստանագիրի մը բացակայութեան պայմաններուն տակ նախագահ Էրտողան ընդմիշտ մեղադրեց Քաւալան գործող կառավարութիւնը տապալելու միտումով «Կէզի»ն ֆինանսաւորելու մեղադրանքով։ Մօտ անցեալին նոյն մեղադրանքով բերման ենթարկուեցան 14 ակադէմականներ, հասարակական կազմակերպութեան գործիչներ, որոնցմէ 13-ը, իսկոյն ազատ արձակուեցան։
Իսկ հիմա «Կէզի»ի ապստամբութեան բանբերներ՝ Թայֆուն Քահրաման, Միւճելլա Եափըճը, Ճան Աթալայ, Ահմետ Սայմատի եւ Հալուք Աղապէյօղլու իրենց հայցերը ներկայացնելու համար հրաւիրուեցան դատախազութեան։
Նոյն օրերուն Անգարայի մէջ ալ 120 մեղադրեալներու դէմ վեց տարբեր հարցաքննութիւն բացուեցաւ։
Ձերբակալման որոշում կայացաւ նաեւ դերասան Մեհմետ Ալի Ալապորայի դէմ։ Նշենք որ Ալապորա «Կէզի»ի դէպքերուն ընթացքին արդէն հեռացած էր երկրէն եւ բնակութիւն հաստատած Իրլանտիոյ մէջ։
Այս զարգացումներու զուգահեռ «Թաքսիմի զօրակցութիւն» հարթակը 3 Դեկտեմբեր երկուշաբթի օր, մամլոյ ժողով մը գումարելով հերքեց բոլոր մեղադրանքները։ Այստեղ Միւճելլա Եափըճը ելոյթ ունենալով յայտնեց, թէ ամբողջովին անիմաստ եւ ապարդիւն մնալու դատապարտուած է «Կէզի»ի դիմադրութիւնը ահաբեկչութեան, բռնի իշխանափոխութեան կամ արտաքին գործիչներու դրդումին վերագրելու փորձերը։ «Կէզի»ի օրերուն բոլոր որոշումները կայացան բացարձակ թափանցիկութեան պայմաններուն տակ։ Երբեք չէ գործադրուած անկապակից տարրերու առաջարկած որոշումները։ Այն ինչ, որ տեղի ունեցաւ որոշուեցաւ ֆորումի դրութեամբ կատարուած խորհրդակցութեամբ։ Այսինքն «Կէզի»ն ո՛չ պետ ունէր, ո՛չ վարիչ, ո՛չ ուղղորդող եւ ո՛չ ալ հրահանգող։ Հետեւաբար կարելի չէր, որ ֆինանսաւորող մըն ալ ունենար։ Եթէ «Կէզի»ի գործընթացի մէջ բռնութեան պատճառաւ մեղադրուելու արժանի մէկը կայ, ան ալ իր սանձարձակ բռնութիւնով մահերու պատճառ դարձող պետական պաշտօնեաները, ոստիկաններն են»։
