Եթէ «քարիքաթիւր» կոչուած արուեստը հայերէնի մէջ իր փոխադարձը կը գտնէ «ծաղրանկար» կամ «երգիծանկար» եզրերով, նկարիչ Օհաննէս Շաշկալ միշտ հարցականի կը մատնէ այդ բառերու սահմանումը։ Շաշկալի գծագրութիւններուն մէջ կը հանդիպինք խորիմաց մտայղացումներու, որոնք դիտողին կը թելադրեն խորհուրդներու վերլուծման լուրջ ջանք մը։ 12 Դեկտեմբեր չորեքշաբթի երեկոյ Գարագիւղ «Շնէյտէր թեմփել» գեղարուեստի սրահին մէջ պիտի ցուցադրուի արուեստագէտի վերջին հինգ տարիներու ընթացքին «Ակօս»ի էջերուն վրայ լոյս տեսած 53 գործերը։
Ցուցահանդէսը կարելի է այցելել մինչեւ 6 Յունուար, բացի երկուշաբթի եւ երեքշաբթի օրերէն 11.00-18.00-ի միջեւ։
