ԷՏՎԻՆ ՄԻՆԱՍԵԱՆ
ԱՄՆ-ի միջանկեալ ընտրութիւնները, որոնց արդիւնքներուն կը սպասուէր անհամբերութեամբ, բացի քանի մը մրցակցային տարածքէ աւարտեցաւ։ Թէեւ նախագահ Թրամբ իր սովորականացած արտայայտութեամբ զանոնք «հոյակապ յաղթանակ մը» որակեց, սակայն իրականութիւնը բաւական տարբեր է։ Յառաջիկայ երկու տարուայ ընթացքին Ներկայացուցիչներու տունը պիտի ըլլայ Թրամբի ընդդիմադիրներու հսկողութեան տակ։ Ներկայացուցիչներու տան տարբեր յանձնաժողովները, որոնք ունին դատական իշխանութիւն, կը ծրագրեն նեցուկ կանգնիլ յատուկ դատախազ Միւլլերի կողմէ Թրամբի վերաբերեալ ընթացող հետաքննութեան։ Ընդհանուր կարծիքը այն է, որ հետաքննութիւնը եթէ չկաթուածահարէ երկիրը՝ պիտի ըլլայ լաւ հսկողութեան եւ հաւասարակշռութեան միջոց մը։
Քոնկրեսի միւս թեւը հանդիսացող ծերակոյտին մէջ կացութիւնը տարբեր է։ Հանրապետականները բարձրացուցած են իրենց կշիռը՝ 51-49 համեմատութենէն, 53-47-ի։
Երկրի տարածքին գրեթէ %9 տոկոս բարձրացած է դեմոկրատներու քուէն։ Յստակ է, որ ԱՄՆ-ի մէջ կը փչէ փոփոխութիւններու հով մը։ Անցեալին հանրապետականներու ամենաուժեղ բերդը նկատուող երկրի արեւմտեան ափը ամբողջապէս կ՚անցնի դեմոկրատականներուն։ Յատկապէս Արիզոնայի ու Նեւատայի մէջ հետաքրքրական են դեմոկրատ ծերակուտական թեկնածուներու յաղթանակը։ Թրամբի դէմ եղած ընդդիմութեան կեդրոնը հանդիսացող Քալիֆորնիան եւս գրեթէ անցած է դեմոկրատ կուսակցութեան իշխանութեան տակ։ Ներկայացուցիչներու տան 53 պատգամաւորներու 40-ը այլեւս դեմոկրատ է։ Անոնք կ՚ըսեն. «Մենք աւելի երիտասարդ, աւելի աշխոյժ, աւելի ստեղծագործ ժողովուրդը, այսինքն ապագան կը ներկայացնենք աշխարհի մեծագոյն հինգերորդ տնտեսութեան»։
Մինչ այդ պէտք է գիտնալ, թէ Թրամբ քուէի համար կը դիմէ այն ամերիկացիներուն, որոնք դեռ իրենց երազներուն մէջ կը կենդանացնեն 1950-ականներու իտէալական ԱՄՆ-ն, աւելի պահպանողական են, տնտեսապէս աւելի ծանր կացութեան մէջ եւ այդ դժուարութիւններու մեղքը կը բարդեն դեմոկրատներուն վրայ, որոնք իրենց կարծիքով կը զօրակցին գաղթականներուն, կը միտին կրօնամոլութեան ու ազգայնամոլութեան։
Հայերը այս ընտրութիւններու արդիւնքին ունեցան երեք պատգամաւոր։ Առկայ զանազան վէճերն ու այս արդիւնքները անշուշտ պիտի չազդեն արտաքին քաղաքականութեան վրայ, որովհետեւ նախագահն ու ծերակոյտը այդ ոլորտէն ներս սահմանադրականօրէն զօրաւոր են։ Իսկ Ներկայացուցիչներու տունը ազդակ մըն է ներքին գործերու մէջ, սակայն կրնայ արտաքին գործերու վրայ հսկել պիւտճէի վրայ ունեցած իր ազդեցութեամբ։ Նիւ Ճէօրզի ծերակուտական Պոպ Մենենտեզի վերընտրութիւնը եւ արտաքին յարաբերութիւններու յանձնաժողովէն ներս, որպէս ընդդիմութեան առաջնորդ ներկայութիւնը դրական զարգացում մըն է հայերու տեսակէտէն։ Բայց հայերու համար անյաջողութիւն որակուեցաւ Թրամբի կառավարութեան Իրանի դէմ գործածուած պատժամիջոցներու մէջ ութը երկիր դուրս ձգելը եւ Հայաստանը այս ցուցակին վրայ չներառելը։
