24Սեպտեմբեր երկուշաբթի երեկոյ Երեւան Գաբրիէլ Սունդուկեանի անուան Ազգային Ակադեմիական թատրոնի դահլիճին մէջ առաջին ներկայացումը կը կայանայ Մաժակ Թօշիկեանի յօրինումով, Գէորգ Էմինի հանրածանօթ բանաստեղծութեան՝ «Սասունցիներու պար»ին։ Միջոցառումը նուիրուած է Հայաստանի Հանրապետութեան անկախութեան օրուան։
Մաժակ Թօշիկեանի յօրինումը կը բեմադրուի Գրիգոր Խաչատրեանի կողմէ, ուր կը ներկայացուին Արման Չուլհակեանի եւ Արա Ասատրեանի պարային յօրինումները։
Գէորգ Էմինի բանաստեղծութիւններու մէջ ժողովուրդի կողմէ ամենաիւրացուած օրինակներէն մէկն է «Սասունցիներու պար»ը, որ ազգային ու հայրենասիրական իր ոգիով միշտ մնացած է թարմ ու այժմէական։ Իսկ Մաժակ Թօշիկեան լռութեան երկար շրջանէ մը ետք վերադարձած է երաժշտական ստեղծագործութիւններուն, մեր երգացանկին բերելով կոթողային յօրինումներ։ Տակաւին յիշողութիւններու մէջ թարմ է անուանի երգահանի Հրանդ Տինքին ձօնած օրաթորիայի տպաւորութիւնները։ Նշենք որ բեմադրութիւնը պիտի կրկնուի 13 Հոկտեմբերին Կիւմրիի մէջ։ Մեզի կը մնայ յուսալ, թէ այս բացառիկ բեմադրութիւնը իր կրկնութիւնը կ՚ունենայ նաեւ Պոլսոյ մէջ։
