Հրանդ Տինք հիմնարկի երկարատեւ ծրագիրներէն է գրաւոր մամուլի մէջ ատելութեան պատգամներու յայտնաբերութիւնը։ Հիմնարկը այս առթիւ ամէն օր կը քննարկէ 39 ազգային եւ 390 շրջանային օրաթերթեր։ Իր ստուգումները կը հրատարակէ քառամեայ պարբերականութեամբ։ Յունուար- Ապրիլ 2018 թուականներու քննարկումները ընդգրկող տեղեկագրին մէջ ընդգծուած են 2,265 օրինակներ մերթ լրատուութեան եւ մերթ ալ սիւնակներու բովանդակութեան առումով։ Տուեալ տեղեկագրի մէջ ազգայնամոլ «Եէնի Աքիթ» օրաթերթը 125 ատելութեան պատգամի օրինակներով առաջին կարգի վրայ է։ Իրեն կը յաջորդեն 89 ատելութեան պատգամներով կրօնամոլ «Միլլի կազեթէ» եւ 64 օրինակներով ալ դարձեալ ազգայնամոլ «Եէնի Չաղ» օրաթերթը։ Շրջանային մամուլի մէջ առաջնութիւնը կը վիճակի «Եէնի Քոնեա» օրաթերթին, 50 ատելութեան պատգամներով։
Այս շրջանին ատելութեան պատգամները ուղղուած են հայերուն, հրեաներուն եւ յոյներուն։
Ատելութեան պատգամները առնչուած են նաեւ օրակարգի նիւթերուն հետ, քանի որ Յունուար-Ապրիլ 2018 թուականի ընթացքին օրակարգ զբաղեցնող գլխաւոր նիւթերը եղան դէպի Աֆրին ուղղուած «Ձիթենեաց ճիւղ» գործողութիւնը, Հոլանտայի խորհրդարանի Հայոց ցեղասպանութեան բանաձեւի քննարկման օրը, Հոճալուի կոտորածներու տարեդարձը, Յունաստանի հետ Քարտաքի ճգնաժամը, Հայոց ցեղասպանութեան յիշատակման օրը, Միջերկրականի վրայ բնական կազ որոնելու աշխատանքները, Պաղեստինեան խնդիրը եւ 24 Յունիսի ընտրութիւնները։
