Հրանդ Տինքի սպանութեան դատավարութիւնը պիտի շարունակուի 10,11 եւ 12 Յուլիս թուականներուն։ Յառաջիկայ շաբաթ կայանալիք նիստերու ընթացքին դատարանը վկայութեան պիտի կանչէ ոճրի գործուած շրջանին Իսթանպուլի Անվտանգութեան տնօրէնութեան եւ Տրապիզոնի Ոստիկան զօրաց հրամանատարութեան շարքերուն պաշտօնավարող կարգ մը անձերը։ Նիստերը պիտի կայանան Իսթանպուլի 14-րդ Եղեռնադատ ատեանի դատասրահին մէջ։ Նախորդ նիստերուն արդէն աւարտուած էր այս խնդրի հետ առնչուած 85 մեղադրեալներու պաշտպանութիւնները։
19 Յունուար 2007-ին գործուած ոճիրէն ետք հիմնական երեք ամբաստանագիրներ պատրաստուած էին։ 3 Յուլիս 2017-ին ընդունուած վերջին ամբաստանագրի շրջանակներուն թղթածրարին մէջ յիշուեցաւ Ֆեթուլլահ Կիւլեն, Զեքերիա Էօզ, Էքրեմ Տումանլը, Ատեմ Եաւուզ Ասլան, Ֆարուք Մերճանի նման անուններ ու նաեւ գլխաւորութեամբ գնդապետ Ալի Էօզի, Տրապզոնի ոստիկան զօրաց հրամանատարութեան կազմին աշխատող ամբաստանեալներ։
Նախորդ դատավարութիւններուն անպարտ հռչակուեցան 24 մեղադրեալներ, հետեւաբար այս պահուն միայն եօթը մեղադրեալ կը շարունակեն բանտարկուած մնալ։ Դատարանը նախորդ նիստերուն մերժած էր նաեւ Հրանդ Տինքի իրաւապաշտպաններուն կարգ մը կասկածելի անուններուն ալ դատուելու մասին կատարած դիմումները։
Նշենք որ Հրանդ Տինքի սպանութենէն ետք մեկնած դատական առաջին գործընթացը աւարտած էր միայն երկու պատժի վճիռներով։ Ոճրագործ Օկիւն Սամասթ անչափահաս տարիքի բերմամբ դատապարտուած էր 11 տարուայ ազատազրկման։ Դատական այս երկրորդ փուլը հեռու է պետական նախաձեռնութիւնով մը գործուած ոճիրի մութ ծալքերը լուսաբանելէ։ Ան այժմ փոխանակ արդարութիւն հաստատելէ, կը ծառայէ պետութեան մէջ առանձին խմբակներ կազմած կարգ մը շրջանակներու իրարու դէմ հաշիւ մաքրելուն։ Այս իրողութիւնը նկատելով Հրանդ Տինքի ընտանիքի անդամները, որոնք հետեւած էին առաջին փուլի բոլոր նիստերուն, այս երկրորդ փուլին մերժած են դատավարութիւններուն մասնակցիլ. «ձեր զաւեշտի դերակատարները պիտի չըլլանք» ըսելով։
