Աւելի քան 200 օրէ ի վեր ձերբակալուած հասարակական գործիչ ու գործարար Օսման Քաւալա դիմեց Մարդկային իրաւանց եւրոպական ատեան՝ «երկարատեւ ձերբակալութեան» դէմ բողոքներով։
Գործարար Քաւալա այս լուրը հանրութեան յայտնեց Յունիս 11-ին, Սիլիվրիի բանտէն յղած իր նամակով։ Աւելի քան եօթը ամիսէ ի վեր բանտի մէջ պահուող Քաւալայի մասին տակաւին որեւէ ամբաստանագիր պատրաստուած չէ։
Հանրային գործիչը իր դիմումը պատճառաբանեց «անմեղութեան կանխավարկածի ճանաչմամբ եւ մարդու ազատութեան տրուած արժէքով»։
«Մայիսի աւարտին Սիլիվրիի մէջ բնակութեանս եօթներորդ ամիսը լրացաւ։ Կը սպասենք ամբաստանագիրի պատրաստութեան։ Մերժուած են ազատ արձակման ուղղեալ բոլոր դիմումները։ Յայտարարութիւն մը կատարելու համար ուզած էի տեսնել թղթածրարիս մէջ գտնուող ինծի վերաբերեալ փաստերը, որովհետեւ ոստիկանութեան հարցաքննութեան ժամանակ ցոյց տրուածները շօշափելի փաստեր չէին։ Մեր այս պահանջքն ալ մնաց անպատասխանի։ Սահմանադրական ատեանէն ետք, դիմեցինք ՄԻԵԱ», գրած է Քաւալա՝ նշելով, թէ այս ատեանը աւելի լաւ գիտէ Եւրոպական մարդկային իրաւանց յուշագիրը։ Քաւալա նշած է, թէ դատարանի մը անարդար որոշումին դէմ չէ իր առած քայլը, այլ առանց դատարանի, ձերբակալութեան երկարատեւ ժամանակին, ինչ որ կ՚առնչուի անմեղութեան կանխավարկածին ու մարդկային ազատութեան։ «ՄԻԵԱ-ին կատարուած դիմումը թէեւ վստահութիւն ներշնչող իրաւունք մըն է, սակայն մարդ ինքզինք անհանգիստ կը զգայ՝ բացայայտելով քաղաքացին եղած պետութեան անձիդ ազատութեան հանդէպ ցուցաբերած արժէքը», սրտցաւօրէն յայտնած է ան։
