Թուրքիոյ թատերական աշխարհի մէջ բաւական բարձր նշանակութիւն ունի Աֆիֆէ Ժալէի անուան ձօնուած մրցանակը։ Այս տարի 22-րդ անգամ կը կայանայ մրցանակաբաշխութիւն, սոյն տարուայ զանազան բեմադրութիւններուն համար։ Աֆիֆէ Ժալէի անուան մրցանակները կը շնորհուին 11 հիմնական բաժնի մէջ, որոնք են՝ տարուայ լաւագոյն բեմադրութիւնը, տարուայ լաւագոյն բեմադրիչը, լաւագոյն դերասանուհին, լաւագոյն դերասանը, լաւագոյն կին եւ այր երկրորդ դերակատարները, լաւագոյն բեմայարդարումը, լաւագոյն տարազի ձեւաւորում, լաւագոյն թատերական երաժշտութիւն, լաւագոյն լոյսի ձեւաւորում եւ լաւագոյն երիտասարդ դերակատար։
Բացի այդ Մուհսին Էրթուղրուլի, Ճեմալ Ֆեհմի Պաշքութի, Հալտուն Տորմենի եւ Եաբը Քրետի դրամատան անուններով չորս յատուկ մրցանակներ կը շնորհուին։
9 Ապրիլ Երկուշաբթի երեկոյ կատարուած մամլոյ ժողովին դատակազմի պետ փրոֆ. Մելիհ Թանկիւն ելոյթ ունեցաւ եւ յայտարարեց այս տարուայ մրցանակաբաշխութեան յաւակնորդները։ Անոնց մէջ յատկապէս ուշագրաւ է անուանի գրող Զապէլ Եսայեանի կեանքէն հատուածներ մեկնաբանող «Զապէլ» թատրերգութիւնը, որ յաւակնորդ է լաւագոյն բեմադրութիւն, լաւագոյն դերասանուհի եւ լաւագոյն թատերական երաժշտութիւն մարզերուն մէջ։
Նշենք որ «Զապէլ»ի գլխաւոր դերասանուհին էր Այսէլ Եըլտըրըմ եւ երաժշտութիւնը յօրինուած էր Արի Հերկելի կողմէ։
Մրցանակաբաշխութիւնը տեղի պիտի ունենայ 14 Մայիս 2018-ին Ոսկեղջիւրի համագումարներու կեդրոնին մէջ։
