«Ակօս»ի նախկին աշխատակից Արիս Նալճը Պրիւքսելէն կը տեղեկացնէ, թէ 5 Յունուար Ուրբաթ կէսգիշերին զինեալ յարձակում գործուած է, այս քաղաքի «Սահակեան» միութեան շէնքին վրայ։ ականատեսներու վկայութեամբ փողոցի անկիւնը գտնուող շէնքի երկու երեսներուն ալ փամփուշտ արձակուած է եւ յանցագործերը խոյս տուած են։ Ոստիկանութիւնը սկսաւ հետաքննութեան։ Դէպքի պատահած պահուն միութեան մէջ ոչ մէկը կար, հետեւաբար կեանքի սպառնացող վտանգ մը չէ գոյացած։ Նալճը կը նշէ թէ միութիւնը կը գտնուի Թուրքիայէն գաղթածներուն բնակած շրջանին մէջ։ Վեց տարի առաջ այս շրջանի հայ եւ ասորի հաստատութիւններուն դէմ եւս յարձակումներ արձանագրուած են։ Իսկ շրջակայքի քաղաքապետը ազգայնական գաղափարներով ծանօթ թուրք մըն է՝ Էմին Քիր։
19 Նոյեմբեր 2016-ին Էմին Քիր իր պաշտօնէութեան տարածքին մէջ գտնուող Քրտական ինստիտուտի հրկիզման դէմ, իբրեւ պատրուակ ներկայացուցած էր Եւրոպայի մէջ կատարուած հակաէրտողանական ցոյցերը։
Սահակեան միութիւնը այժմ փակ է։ Կ՚ակնկալուի, որ քանի մը օր ետք բացուի։ Միութիւնը տարիներ առաջ հիմնուած էր իբրեւ ֆութպոլի ակումբ։ Իսկ վերջերս ակումբի մէջ կը մէկտեղուին Պրիւքսելաբնակ հայեր։
Յարձակում Տենիզ Նաքիի դէմ
Ամէտսփոր ֆութպոլի ակումբի առաջատար խաղացողներէն Տենիզ Նաքիի ինքնաշարժին դէմ զինեալ յարձակում կատարուած է։ 7 Յունուարի կէսգիշերին երբ Նաքի իր ինքնաշարժով կը սուրար Ահընի մայրուղիին վրայ կողքէն անցնող ինքնաշարժէ մը կրակած են իր վրայ։ Նաքի այդ կրակոցէն չէ վնասուած, քանի որ արձակուած փամփուշտները հանդիպած են ինքնաշարժին։
Ինչպէս Տենիզ Նաքի ոստիկանատան պաշտօնեաներուն ալ կը յայտնէր, յարձակումները իսկոյն կը յուշեն պատգամաւոր Կարօ Փայլանի վերջերս կատարած ազդարարութիւնը։ Փայլան Խորհրդարանի մէջ սարքած մամլոյ յայտարարութիւնով մը ահազանգ հնչեցուցած էր վերջերս Եւրոպայի մէջ հայերու, ալեւիներու կամ թուրք այլախոհներու ուղղեալ յարձակումներու մասին լսումներու շուրջ։ Փայլանի պնդումով այդ լսումները կու գային հաւաստի աղբիւրներէ եւ գերմանական մամուլն ալ տեղեակ էր այդ լսումներէն։
