Սուրբ Փրկիչ Հիւանդանոցի հոգաբարձութեան ատենապետ եւ հայկական հիմնարկներու համագործակցութեան միութեան՝ ՎԱՏԻՓ-ի նախագահ Պետրոս Շիրինօղլու 22 Դեկտեմբերին Անգարայի մէջ հանդիպում մը ունեցած է Հանրապետութեան նախագահ Էրտողանի հետ։
Այս հանդիպման մասին Նախագահական պաշտօնական աղբիւրներէն որեւէ յայտարարութիւն չէ կատարուած։ Շիրինօղլու ինք եւս լռութիւն պահած է այս հանդիպման մասին։ Հասարակութիւնը հանդիպումէն տեղեակ եղաւ 3 Յունուար թուակիր «Ժամանակ» թերթի հրապարակումներով։ Այստեղ կ՚ըսուէր, թէ քննարկման նիւթ դարձած են համայնքը յուզող զանազան երեւոյթներ, բայց Շիրինօղլու խուսափած է այս մասին որեւէ յայտարարութիւն կատարելէ։ Ան գոհացած է հանդիպման ժամանակ հիւանդանոցի անցեալի բանջարանոցի խնդիրով, քանի որ այդ տարածքը նախապէս հիւանդանոցի սեփականութիւնն էր, բայց անցեալին ապօրէն կերպով գրաւուած էր պետութեան կողմէ։ Տարածքը աւելի ուշ այժմու կառավարութեան օրօք փոխանցուած էր հիւանդանոցին, սակայն այս անգամ ալ Զէյթինպուրնուի քաղաքապետարանը, թէ արժեզրկած էր այդ տարածքը յայտարարելով կանանչ դաշտ եւ թէ խոչընդոտած էր փոխանցման գործընթացը։ Որքան ալ յստակ արգելքներ խնդրոյ առարկայ չըլլան պարոն Շիրինօղլուի համաձայն խնդիրը այժմ մտած է դէպի լուծման փուլ։
Այս մասին Շիրինօղլու հրապարակած է նաեւ բացատրութիւն մը, ուր կ՚ըսուի հետեւեալը՝ «Մեծայարգ նախագահէն ժամադրութիւն մը խնդրած էի։ Հակառակ իր խճողուած օրակարգին ազնիւ գտնուեցաւ մեր խնդրանքը կատարելու եւ այսպէս հանդիպում մը տեղի ունեցաւ Պէշթեփէի նախագահական նստավայրին մէջ։ Մեր հանդիպման ներկայ էին նաեւ Վաքըֆներու ընդհանուր տնօրէն Ատնան Էրթեմ եւ Արտաքին գործոց նախարարութենէն խորհրդատու մը։ Իսկ ինծի կ՚ընկերակցէր մեր հոգաբարձութեան անդամներէն Հերման Պալիան։ Երախտապարտ ենք նախագահի բարի մեծարութեան համար։ Ինչպէս նախապէս այս անգամ եւս ունեցանք մտերմիկ զրոյց, որու ընթացքին հաղորդեցինք մեզ յուզող խնդիրները։ Հանդիպման ընթացքին մօտ հետաքրքրութիւն եւ ուշադրութիւն ցուցաբերող նախագահը խոստացաւ իր բոլոր կարելիութիւններով դիւրացնել հիւանդանոցը յուզող խնդիրները։ Ինչպէս ՎԱՏԻՓ-ի վերջին ժողովին նշած էի, որոշած եմ յետ այսու չխօսիլ պատրիարքական ընտրութեան նիւթով։ Ափսոս, որ մեր համայնքէն ներս կարգ մը շրջանակներ նախագահի հետ մեր ունեցած հանդիպումներու թելադրած լրջութենէն հեռու մերձեցումով մը կը փորձեն, որպէս քարոզչութեան գործիք։ Այս իսկ պատճառաւ ալ յարգելի նախագահի հետ մեր ունեցած տեսակցութեան միայն հիւանդանոցը հետաքրքրող բաժնին մասին պիտի խօսիմ։ Արդարեւ այս հանդիպման ինծի կ՚ընկերակցէր հիւանդանոցի վարչական գործընկերս Հերման Պալիեան»։
Շիրինօղլու ապա անդրադարձաւ գրաւեալ հողատարածքի խնդրին եւ ըսաւ, որ նախկին բանջարանոցի տարածքի առումով անարդարութիւն մը կայ եւ այդ անարդարութիւնը յաղթահարելու մարմաջին մէջ ենք։ Մեր պայքարը ո՛չ թէ պետութեան ուղղուած է, այլ ընդհակառակը վստահած ենք պետութեան արդարութեան եւ կը յուսանք, թէ արդարադատական համակարգը պիտի յաջողի լուծել այս գոյացած սխալ ընթացքը։
Շիրինօղլու նաեւ յիշեց, թէ խնդրոյ առարկայ բանջարանոցը պոլսահայ ժողովուրդի յիշողութեան մէջ շատ աւելի խոր նշանակութիւն եւ յիշատակներ ունի։
Շիրինօղլու նաեւ փառաբանեց նախագահ Էրտողանի քաղաքական գործունէութիւնը, քանի որ իր իշխանութեան շրջանին Թուրքիոյ հայ հասարակութիւնը դադրած է երկրորդ կարգի քաղաքացի համարուելու ընկալումէ։ «Այժմ մեր իրաւունքները կը վերադարձուին եւ պետութիւնը շատ աւելի ջերմ յարաբերութիւն կը պահէ հայ հասարակութեան հետ։ Իսթանպուլ զանազան կրօններու բնօրրան ըլլալով աշխարհի վրայ եզակի բնոյթ ունեցող քաղաք մըն է։ Արդարեւ քաղաքը իր այս յատկութիւնով արժանի է համաշխարհային նախանձ գրգռելու։ Փոքրամասնութեան հաստատութիւններն ալ այս դիմագիծի պահպանման առումով շատ բարձր նշանակութիւն ունին։ Ես կը յուսամ, թէ պետութեան հովանաւորութեան ներքոյ կը զարգանան մեր հաստատութիւնները»։
