Դիտելով երկրագունդի բազմաթիւ կէտերու վրայ բոցավառուող կրակը, վերլուծաբաններ արդարօրէն կրնան կանխագուշակել ձախորդ օրերը։ Տնտեսագէտներ կրնան կանխատեսել աշխարհասփիւռ խաղաղ բնակչութեան սպառնացող աղքատութիւնը։ Նոյնիսկ բնապահպաններ կրնան ահազանգ հնչեցնել աշխարհի միջին ջերմաստիճանի բարձրացումով գոյանալիք աղէտներու համար։
Արդէն այդ սպառնալիքներու տակ անցած բովանդակ տարի մը լրացուցինք եւ կը պատրաստուինք թեւակոխել յաջորդին։ Այս պահուն կը յիշենք աշխարհի ամենադաժան պահերուն իսկ իրենց յոյսերը վառ պահած, ողջակիզման ճամբարներուն, տարագրութեան ճանապարհներուն կամ գաղթակայաններուն մէջ, պարիքաթներու վրայ կամ սահմանագծի խրամատներու խորքին, կամ բանտախցիկներու հաստ պատերու ետին անգամ ամանորը բարի մաղթանքներով դիմաւորող մարդկութիւնը եւ անգամ մը եւս կը հաստատենք մեր կամքը՝ պիտի դիմադրենք բոլոր չարիքներուն ինչպէս նախորդ, նոյնպէս յաջորդ տարուայ մէջ եւս։
Կեցցէ՜ մարդու դիմադրութեան կորովը չարիքի ու խաւարի դէմ։
Շնորհաւոր Նոր Տարի ձեզի, մեզի եւ բոլորին, բոլորին…
