Հայ երաժշտական աւանդը Պոլսոյ մէջ լաւագոյն ներկայացնող երգիչն է Սահակ Պարթեւ Կարեան, որ վերջերս լոյս ընծայեց իր սոյն տարուայ համերգային ծրագրի ձայնագրութիւնը ֆլէշ յիշողութեան դրութեամբ։
Ձայնագրութեան մէջ կը հանդիպինք Խաչատուր Աւետիսեանի «Իմ Լաւ», «Կապոյտ Երազ», «Այ Սեւ Աչերով Աղջիկ», «Իմ Անուշ Տաւիղ», «Իմ Եղեգ» ստեղծագործութիւններուն եւ մեծ երգահանի ցեղասպանութեան զոհերու ձօնուած օրաթորիայէն «Տաղ Յայտնութեան» հատուածին։ Մաժաք Թօշիկեանի Յովհաննէս Շիրազի խօսքերուն վրայ յօրինած «Արարատ»ը, Ալեքսէյ Հեքիմեանի անմորանալի յօրինում «Բարի Արագիլ»ը, Փոլ Պաղտատեանի «Հայ Որդիք», Յարութ Փամուքճուեանի «Քեզ Բարի Լոյս» ծանօթ երգերը, եւս մաս կը կազմեն 21 գործերէ բաղկացող երգացանկին։
Պարթեւ Կարեանի առանձնայատկութիւններէն է գործակցիլ զանազաններու հետ եւ վեր հանել անոնց երաժշտական վաստակը։ Արդարեւ այս աշխատութեան մէջ ալ ան կը ներկայացնէ իրեն ընկերակցող բազմաթիւ նուագածուները, երգչուհիները եւ երգահանները։ Հայերէն երգի սիրահարներու համար անգտանելի հաւաքածոյ մըն է, որ դրուած է մեր սեղանին վրայ եւ կարելի է ապահովել Օսմանպէյ Նուսթալֆի գրախանութէն։
