Խիստ կասկածելի զարգացումներ Պիւյիւքտերէի մէջ

Անգամ մը եւս զեղ­ծա­րարու­թեան շշուկներ կը շրջին ազ­գա­պատ­կան հո­ղատա­րած­քի մը շուրջ։ Այս ան­գամ Պիւ­յիւքտե­րէ թա­ղի Սուրբ Հռիփ­սի­մեանց եկե­ղեց­ւոյ թա­ղական խոր­հուրդի ատե­նապետ Մու­րատ Սիւ­մէ նշա­ւակ կը դառ­նայ զա­նազան մե­ղադ­րանքնե­րու։ Խնդի­րը կը ծա­գի եկե­ղեցա­պատ­կան նախ­կին գե­րեզ­մա­նի տա­րած­քին շա­հագործման ակնկա­լու­թե­նէն։ Նա­խապէս «Ակօս»ի էջե­րուն մէջ ար­ձա­գան­գած էինք այս զեղ­ծա­րարու­թեան մա­սին պնդումնե­րու, քա­նի որ Մու­րատ Սիւ­մէ պաշ­տօ­նի եկած օրէն սկսեալ ձեռ­նարկած էր կարգ մը անըն­դունե­լի քայ­լե­րու։

Ան նախ փոր­ձած էր եկե­ղեց­ւոյ պար­տէ­զը վար­ձու տալ սրճա­րանի մը, պատ­ճա­ռաբա­նելով թէ եկե­ղեցին կա­րիք ու­նի այդ եկա­մու­տին։ Այդ օրե­րուն կրօ­նական իշ­խա­նու­թեան ալ մի­ջամ­տութեամբ Սիւ­մէ հրա­ժարած էր այդ քայ­լէն եւ հա­տու­ցում տա­լով միայն յա­ջողած էր վար­ձա­կալը դուրս հա­նել իր գրա­ւած տա­րած­քէն։ Այս ան­գամ տհաճ հո­տերը կը հաս­նին նախ­կին գե­րեզ­մա­նատու­նէն, որ Վա­քըֆ­նե­րու օրէն­քի վեր­ջին փո­փոխու­թիւննե­րով վերստին տրա­մադ­րուեցաւ եկե­ղեցիին։ Հի­մա Սիւ­մէ կ՚ու­զէ այդ տա­րած­քին վրայ շի­նու­թեան ար­տօ­նու­թիւն ձեռք բե­րել եւ ար­ժե­ւորել հո­ղատա­րած­քը։

Ան վեր­ջերս «Ակօս»ին տուած լու­սա­բանու­թիւնով մը հեր­քած էր այս մա­սին պնդումնե­րը ըսե­լով որ ինք ո՛չ մէկ նա­խաձեռ­նութիւն ու­նե­ցած է եկե­ղեց­ւոյ տա­րած­քին հա­մար։ Սա­կայն փաս­տա­ցի տուեալ­նե­րով կ՚ապա­ցու­ցուի ճշմար­տութիւններ եւ պարզ կը դառ­նայ որ Սիւ­մէ ստած է իր յայ­տա­րարու­թիւննե­րուն մէջ։

Միւս կող­մէ նոյն թա­ղի Լա­տին Կա­թողի­կէ Եկե­ղեցին ալ դատ բա­ցած է Սիւ­մէի դէմ,պնդե­լով, որ ան դի­տումնա­ւոր կեր­պով յափշտա­կած է լա­տին կա­թողի­կէ հա­մայնքին պատ­կա­նող գե­րեզ­մա­նատու­նը եւս։ Ան­ցեալին եկե­ղեցին այս զար­գա­ցու­մէն ալ ան­հանգիստ եղած եւ պա­հան­ջած էր որ Մու­րատ Սիւ­մէ վե­րադարձնէ կա­թողի­կէ հա­մայնքին պատ­կա­նող տա­րած­քը։ Բայց այս վեր­ջինս անդրդուելի մնա­ցած էր եւ մեր­ժած տա­րած­քը վե­րադարձնել իր բուն տի­րոջ։ Վեր­ջին զար­գա­ցումնե­րու լոյ­սին տակ կը յստա­կանայ, թէ Սիւ­մէ իշ­խա­նու­թիւննե­րու մօտ եկե­ղեցին ներ­կա­յաց­նե­լու հա­մար 7 Օգոս­տոս 2017-ին իրա­ւական փո­խանորդ նշա­նակած է Չե­թին Նա­յիմ անուն ան­ձը։ Իսկ այս վեր­ջի­նը իր ձեռքբե­րած լիազօ­րու­թիւնը 25 Օգոս­տոս 2017-ին փո­խան­ցած է Ֆե­րեալ Թան­րը­վեր­տի անուն ան­ձին։

Սիւ­մէի տե­ղի տուած զեղ­ծա­րարու­թիւննե­րը բա­ւական բազ­մաբնոյթ են, որոնց կար­գին կ՚ար­ժէ յի­շել եկե­ղեցա­կան պատ­կան դպրո­ցի շէն­քի վար­ցու տա­լու պայ­մաննե­րը։ Ար­դա­րեւ թա­ղի եր­բեմնի Սա­հակ Մես­րոպ վար­ժա­րանը Սիւ­մէի կող­մէ վար­ցու տրուած է 20 տարի պայմանով եւ ամսական 500 ԹԼ.-ի նման ծիծաղելի գումարով։