Գովք ամբոխի զօրութեամբ
Արձակէ աղաւնին… թող ալեկոծի մեր շնչով… ու սրբէ աչքերդ։ Դեռ օրը չէ եկած։
Ո՛չ աղաղակները կրնան կասեցնել, ո՛չ արցունքները։ Տեսանք կոտորածները։ Կոտրուեցան գրիչներն ու ակնոցները, կաւիճները… եւ արիւնը չէ չորցած։
Արձակէ աղաւնին… թող ալեկոծի մեր շնչով…։ Կողք կողքի ըլլալու ուժը վայելէ։ Սուգ չէ այս մխացողը… սուգ չէ, վիշտը սիրտ մը պակաս մնալուն։
Արտասուքը պայծառ օրերուն արշալոյսին թող, շուշաններու կոկոններուն... Դեռ օրը չէ եկած։
Ե՛լ, քայլերուդ հետքը մնայ փողոցին։ Սա փոխուելու դարպասն է եւ անշուշտ փոխելու։
Ան արեամբ մակագրեց գրածները։ Ու հաւատաց ամբոխներուն։ Հիմա ամբոխները թող փաստեն իրենց զօրութիւնը։
Հին, շատ հին դարերուն այս բազմութիւնը կրնար վերակենդանացնել մահացածը։ Հիմա սիրտ սրտի, ուս ուսի երթի է կանգնած, ոճիրը արգիլելու համար…
Սեննուր Սեզեր
Բանաստեղծութիւնը ժամանակի արձագանգը կը պահէ իր մէջ։ Խինդ, աղաղակ, սուլոցներ… Սիրոյ երգեր կը խառնուին քայլերգերուն, ողբերգերուն մանկան ճիչեր։ Բազմաձայն երգչախումբ մըն է բանաստեղծութիւնը, բազմանդամ նուագախումբ մը։ Բանաստեղծներ թէկուզ արքաներու գովքը հիւսեն, այդ ձայները մուտք չեն գործեր բանաստեղծութեան նուագախումբին։ Մէկ տարի անց կը մաշի կը փճանայ, այդ գովերգութեան կտաւը։
Կեանքի գովերգութիւնն է որ չի մաշիր, արդարութեան ու սիրոյ գովերգութիւնը։ Մէյմնալ բռնակալներուն ուղղուած երգիծանքը կ՚ապրի դարերով։
**
Այս տողերը առնուած են մեր ժամանակներու վաստակաւոր բանաստեղծուհի Սեննուր Սեզերի Բանաստեղծութեան համաշխարհային օրուայ առթիւ գրի առած պատգամէն։ Սեննուր Սեզեր մանկութենէն սկսեալ իր գիտակցութիւնը ձեւաւորեց բանուոր դասակարգի պայքարին մէջ։ Այդ կազմը դրոշմուեցաւ նաեւ իր գրականութեան ու բանաստեղծուհին միշտ հաւատարիմ մնաց իր ուխտին։ Վերջերս «Մանոս» հրատարակչատունը գեղատիպ հատորի մը մէջ հաւաքեց նշանաւոր բանաստեղծուհիի բոլոր գործերը, ուր կը հանդիպինք նաեւ Հրանդ Տինքին ձօնուած այս քերթուածին։