.jpg "Սրբապղծուած է Միջին Արեւելքի հայկական մեծագոյն եկեղեցին")
Միացեալ Նահանգներու մէջ հրատարակուող armenianweekly.com համացանցի մամուլը հրապարակեց Տիյարպէքիրի Սուրբ Կիրակոս Եկեղեցւոյ այժմու իրավիճակը պարզող լուսանկարներ։ Այս մասին կատարած լրատուութեան մէջ գործակալութիւնը կը նշէ թէ լուսանկարներ գատնաբար առնուած են Յուլիս ամսուան մէջ։
Սուրբ Կիրակոս Եկեղեցին երկար տարիներ աւերակ մնալէ ետք թաղական խորհուրդի, նախկին տիգրանակերտցիներու եւ Տիյարպէքիրի քաղաքապետարանի ջանքերով վերանորոգուած եւ 22 Հոկտեմբեր 2011-ին վերաբացուած էր մեծ ոգեւորութիւն պատճառելով համայն հայութեան եւ տեղւոյն բնակիչներուն։
Եկեղեցիի վերաբացումով պատահած էր շահեկան անակնկալ մը եւ բազմաթիւ ծպտեալ հայեր սկսած էին հրապարակ իջնել եւ համախմբուիլ եկեղեցւոյ կամարներուն ներքեւ։ Հայ հոգեւոր գրականութեան մէջ յաճախ կը շեշտուի «եկեղեցին ժողովուրդ է» հաստատումը։ Այս շրջագծով Սուրբ Կիրակոսի այս նոր օծումը եւ վերաբացումը հրաշքի համազօր ապացոյց մը եղաւ սոյն հաստատումին համար։
Ափսոս որ Թուրքիոյ վերջին տարիներուն որդեգրած ռազմատենջ քաղաքականութիւնով եկեղեցւոյ տարածքը անհասանելի եղաւ բոլորին համար։ Նախապէս մամուլի մէջ յայտնուած էին կարգ մը լուսանկարներ, ուր կը տեսնուէին Յատուկ Ծառայութեան ոստիկանները եկեղեցւոյ մէջ։
Ինչպէս ամերիկահայ պարբերականի հրապարակած լուսանկարներով ալ յայտնի կը դառնայ թէ գոյացած վնասը շատ մեծ չէ եղած բաղդատմամբ նոյն տարածքի մէջ գտնուող այլ սրբավայրերու։ Մանաւանդ նշենք որ Սուրբ Կիրակոսի ալ գտնուած եւ ՈՒՆԷՍՔՕ-ի կողմէ մօտ անցեալին «համաշխարհային մշակութային ժառանգ» համարուած թաղամասը հիմնայատակ կործանուած է եւ երկու հոգիի ուս ուսի քալելուն անգամ առիթ չընծայող նեղլիկ փողոցները վերածուած են ընդարձակ տարածքներու։ Ուրեմն կարելի է մխիթարուիլ թէ Սուրբ Կիրակոս գոնէ առայժմ նուազագոյն վնասով դուրս եկած է այս բարբարոսական կործանումէն։ Իսկ եկեղեցւոյ հօտը յոյսով կը սպասէ պայմաններուն բարելաւման եւ եկեղեցիին վերստին պաշտամունքի բացուելուն օրերը։
