Պէյքոզի Սուրբ Նիկողայոս Եկեղեցւոյ թաղականութիւնը իր սեփականութեան մէջ գտնուող հողատարածքին եւ ստացուած հատուցման գործածման մասին բացատրութիւններ տուաւ։ Յայտարարութեան մէջ նշուեցաւ թէ 25 Յուլիսին Պատրիարքարանի մէջ կայացած ժողովի լուրը մամուլի մէջ կարգ մը դիւրիմացութիւններու տեղի տուած է։ Սխալ հասկացողութիւնները կանխելու համար կը յայտարարենք թէ՝
ա) Թաղական խորհուրդիս սեփականութիւնը եղող հողատարածքի համար կազմուած յանձնախումբը համայնքի անդամներէն բաղկացած կամաւոր խորհրդակցութեան մարմին մըն է։ Թաղականութեան իրաւասնութիւնները եւ լիազօրութիւնները խորհրդին չեն փոխանցուած։ Վաքըֆներու օրէնքը նման փոխանցումի մը կարելիութիւն չի տար։ Ինչպէս 13 Փետրուարի մեր յայտարարութեան մէջ ալ նշուած է թաղականութիւնը իր պաշտօնավարութեան շրջանին բոլոր նիւթերու ներառեալ հողատարածքի խնդրին մէջ միակ լիազօրն է։
բ) Վաքըֆներու օրէնքը մեր թաղականութեան փոխանցուած հատուցումը միայն նոր կալուած գնելու համար գործածելու իրաւունք կու տայ։ Մենք ալ այս ուղղութեամբ պիտի աշխատինք։
գ) Մինչեւ նոր կալուած մը գնուի հատուցման գումարը լաւագոյնս արժեգաւորելու համար խորհրդակցութիւններու սկսած ենք։ Արդէն խորհրդակցական մարմինն ալ այս նպատակով օրակարգի եկած էր։
Փաստաբանին բաժինը զեղչուած
Սուրբ Նիկողայոս Եկեղեցւոյ տարածքի արժանի կերպով շահագործման համար կազմուած յանձնախումբը իր առաջին աշխատութիւնը տարաւ իրաւաբան Ալի Էլպէյօղլուի հետ։ Ժողովի աւարտին զեղջուեցաւ փաստաբան Ալի Էլպէյօղլուի ստանալիք բաժինը եւ ջնջուեցաւ տարածքի շինութենէն ետք իրեն լիազօրութիւն ընդձեռող յօդուածը։
Այս մասին կատարուած է հետեւեալ յայտարարութիւնը՝ «Պէյքոզի թաղականութիւնը եւ նորակազմ խորհրդակցական մարմինը 1 Օգոստոս 2017-ին ժողով գումարած են Պատրիարքարանի մէջ։ Սոյն ժողովին նախագահած է Սահակ Արք. Մաշալեան։ Իսկոյն դիւան մը կազմուեցաւ, որուն նախագահութիւնը յանձնուեցաւ Արեք Ֆերահեանին եւ մամլոյ բանբեր կարգուեցաւ Յարութիւն Շանլը։ Քննարկուեցաւ նախորդ վերջին ժողովի ընըացքին իրաւապաշտպան Ալի Էլպէյօղլուի եւ թաղական խորհուրդի միջեւ հաստատուած համաձայնութիւնը։ Բանակցութիւններու աւարտին Պէյքոզի Հիմնարկին Քաղաքապետարանի հետ ունեցած դատի համար ճշդուած տասնըչորս առ հարիւր տոկոսը զեղջուեցաւ ութը առ հարիւրի։ Այսպէսով կնքուեցաւ նոր համաձայնագիր մը։ Բացի այդ Փաստաբան Ալի Էլպէյօղլուի եւ Պէյքոզի թաղականութեան միջեւ նախապէս կնքուած համաձայնութիւնն ալ չեղեալ համարուած եւ այս որոշումը արձանագրուած է հիմնադրամի ատենագրութեան մէջ»։
Ժողովը իր աւարտին հասաւ այլ նիւթերու քննարկումէն ետք։
Մեր կարծիքը նկատի չառին
Պէյքոզի հողատարածքին մասին կարծիքներ յայտնեցին նաեւ 2016-ին իրաւասութիւնը վերջ գտած Պատրիարքարանի Կալուածոց Յանձնախումբի անդամները։ Անոնք խմբովին այցելեցին խմբագրատուն եւ բացատրութիւններ տուին իրենց շրջանին կատարուած աշխատութիւններու մասին։
Այս այցելութեան դրդապատճառը եղած է նորակազմ յանձնախումբի մասին մամուլի մէջ լոյս տեսած լրատուութիւնը։
Դանիէլ Անթիքաճըօղլու, Արսէն Էրոլ, Մուրատ Վուրալ, Մկրտիչ Արծիւեան եւ փաստաբան Էօմէր Քանթիկէ բաղկացող նախկին Կալուածոց Յանձնախումբը քննադատելով նախորդ շաբաթուայ մէջ կատարուած յայտարարութիւնները, տուաւ հետեւեալ բացատրութիւնը՝ «ժողովի ընթացքին փոխանցուած տեղեկութիւններու կարեւոր մէկ մասը սխալներով լեցուն է։ Պնդուած է թէ մեզի դրամատունէն գանձում կատարելու լիազօրութիւն տրուած է։ Բոլորովին անհիմն պնդում մըն է։ Նման իրաւասութիւնը ո՞վ կրնայ տալ։ Միայն թաղականութիւնը ունի այդ լիազօրութիւնը։ Բացի այդ կ՚ըսուի թէ հողի գործածութեան իրաւունքը տրուած էր, բայց անոնք վերածեր են վարձելու իրաւունքի։ Այս իրաւասութիւնը տուողը ո՞վ է»։
Դանիէլ Անթիքաճըօղլուի այս բացատրութիւններէն ետք Կալուածոց Յանձնախումբի նախկին անդամներէն Շահին Կեզեր ալ յայտնեց թէ խնդրոյ առարկայ տարածքը 50 հազար քառակուսի մեթր է։ «Մենք 34 հազար քառակուսի մեթրի համար դատ բացած էինք եւ նշած էինք թէ քատասթրոյի քննարկումէն առաջ մեր իրաւունքները վերապահուած են։ Աւելի ուշ Աթէշեան հրաժարեցաւ այս դատէն։ Այժմ նոր շրջանին նշուած այդ 15 հազար քառակուսի մեթրի համար ալ պէտք է դատ բացուի»։
Լուծարքուած յանձնախումբի անդամները նշեցին որ տարածքի շահագործումը նախապէս փոխանցուած էր Սուրբ Փրկիչ Հիւանդանոցին։ Արամ Սրբազանի միջամտութեամբ այդ իրաւունքը հիւանդանոցէն առնուելով փոխանցուեցաւ Յովակիմ 1461 հիմնադրամին։ Յանձնախումբի նախկին անդամները այս որոշումն ալ խստօրէն քննադատեցին եւ սխալ համարեցին։ «Մենք այդ ժամանակ այս լսելով իսկոյն դիմեցինք հիւանդանոցի հոգաբարձութեան։ Զգուշացուցինք զիրենք ըսելով որ բարդութիւններ կրնար գոյանալ հետեւաբար ետ մի մնաք ձեր պահանջատիրութենէ։ Այդ ժողովին մէջ Արամ Սրբազան մեզ խստօրէն յանդիմանեց –Դուք ո՞վ կ՚ըլլաք, որ նման միջամտութիւններ կ՚ունենաք- ըսելով» ըսաւ Շահին Կեզեր։
