ԼՈՒՍՅԷՆ ՔՈՓԱՐ
Թուրքիոյ մէջ հայերէն երաժշտութեան առաջատար անուններէն է Սահակ Պարթեւ Կարեան։ Ան 8 Մայիս Երկուշաբթի երեկոյ Պաքըրգիւղ Լեյլա Կենճէրի անուան դահլիճի մէջ համերգով մը ներկայացաւ հանրութեան։ Կը մտմտայի թէ ծանօթ դէմքերով շրջապատուած, ծանօթ երգերէ բաղկացող համերգը նոր ինչ կը խոստանար ինծի։ Երբ Պարթեւի դուստրը բացման խօսք արտասանելու համար բեմ ելաւ ես ալ ներքուստ կը խորհէի թէ որքան մեծ երջանկութիւն ըլլալու է աղջիկ զաւակ ունենալ։ Չէ որ Արեւ իր արտասանութեան բոլոր շեշտերուն մէջ կ՚ապացուցէր թէ տոգորուած է «ան իմ հայրս է»ի պարծանքով։ Վստահ եմ որ Պարթեւի կատարողական յաջողութեան մէջ Արեւն ալ իր ուրոյն դերը ունի։
Համերգը սկսաւ Կոմիտաս վարդապետի դաշնամուրային ստեղծագործութիւններէն «Վաղարշապատի Պար»ով։ Այս ստեղծագործութիւնը աւելի ետք լարային քառեակի համար վերամշակուած է Սերկէյ Ասլամազեանի կողմէ։ Այդ առաջին կատարումով արդէն գտած էի այս համերգին կախարդական ոգեւորութիւնը։ Ճիշդ է որ լսածներս ծանօթ երգեր էին, բայց կը հնչէին արտակարգօրէն յաջող գործիքաւորումով մը։ Այդ զգացումը շարունակուեցաւ բոլոր երգերու ընթացքին։ Բայց «Արարատ»ը ուրիշ տեսայ ոգեւորեց զիս։ Իսկ ամբողջ դահլիճը կը թնդայ, երբ անուանի երգիչը կը կատարէր հանրածանօթ «Հալա Հալա Նիննօ» պարերգը, այս անգամ փոխանակ Մուսա Լերան, Տիգրանակերտի ոճով։ Ձայնանիշերու ելեւէջին մէջ կարելի չէր պոռթկումը զսպել։ Արդարեւ ծանօթ պարուսոյց Յակոբ Կիւլէչի երեք ընկերներու հետ սկսած շուրջ պարը աւելացաւ ու աւելացաւ եւ հասաւ ամբողջ նրբանցքը լեցնող երիտասարդներու ուս ուսի օրօրման հրաշք պատկերին։
Համերգի երկրորդ բաժնի սկիզբը հաճելի անակնկալ մըն էր։ Բեմ եկան պատանի նուագածուներ, իրենց հետ ունենալով տարեկից մենակատար մը, որոնք ներկայացուցին Փոլ Պաղտատեանի «Հայորդիք» ծանօթ երգը։
Պարթեւ մի առ մի ներկայացուց պատանի երաժիշտները եւ հպարտութեամբ յայտարարեց թէ բոլորն ալ իր սիրելի գործընկերոջ Արի Հերկելի աշակերտներն են։
Ինչպէս նախորդ համերգներուն այս անգամ ալ Պարթեւին կ՚ընկերակցէին «Առագաստ» նուագախումբը եւ երգչուհի Մարալ Չափան Աթաման։ Անոնց կատարած «Հրդեհ ու Մրրիկ» զուգերգը դարձեալ շատ մեծ ոգեւորութիւն ստեղծեց դահլիճին մէջ։
Համերգին իրենց պարերով յատուկ փայլ մը տուած էին նաեւ Թամար Եաշկիւչլիւքալ եւ Էնտէր Ազըն։
Միայն իր կատարած գործին մէջ բարձունքներ նուաճողներն են որ այսքան համեստ կրնան ըլլալ։ Ուրեմն մենք բեմի իր համեստութեան մէջ կը տեսնենք հայ երգին նուիրեալ հսկան եւ անգամ մը եւս կը կրկնենք նոյն հաստատումը՝ Անզուգական ես մեզ համար։
