Արա Գեղեցիկի առասպելը՝ ըստ Չանաքքալէի հայերի
ՄԱՍ Բ
Արդէն բաւական ժամանակ անցած էր, ինչ Արա Գեղեցիկը հրաժեշտ էր տուել Զուարթին եւ իր ճերմակ նժոյգով ճամբայ ընկել գտնելու Շամիրամի մօտ պահուող դեղը, որ պիտի բանար իր հօր՝ հայոց Արամ թագաւորի աչքերը։ Եւ ահա Արան մէկ այլ բերդի կը հանդիպի ու նորէն ձայն կու տայ՝ «Է, հէ՜յ, ո՞վ կայ այդտեղ»։
Բերդի պատուհանէն լուսեղէն, հուռի փերի աղջիկ մը կը պատասխանէ, թէ՝ «ի՞նչ կը փնտռես հոս, ա՜յ սիրուն երիտասարդ։ Չե՞ս մեղքնար քու կեանքիդ, որ մինակդ համարձակեր ես գալ եօթը գլխանի դեւին սահմանները»։
Արան կը հիանայ աղջկայ ձայնին քնքշութենէն եւ մէկ բաժակ ջուր մը կը խնդրէ։ Աղջիկը որ դուռը կը բանայ, կը տեսնայ Արայի գեղեցկութիւնը, կը սկսի լալ. «Ես ինծի չեմ մեղքնար, բայց քեզի պէս գեղեցիկ երիտասարդին մեղք է, որ զոհ դառնայ չար դեւին»։
Արան, սակայն, կ՚ըսէ թէ ինքը վախենալու բան մը չունի։ Արայի խիզախութենէն ոգեւորուած՝ աղջիկը քիչ մը սիրտ կ՚առնէ։ Արան ջուրը խմելու ընթացքին աղջկան աչքերուն կը նայի ու կը սիրահարի, աղջիկն ալ՝ Արային։
Մէյ մըն ալ հողը կը դղրդայ, փոթորիկ մը կը բարձրանայ, ծառերը հողէն կը պոկուին դեսուդէն կ՚ընկնին. Դեւը կու գար.
-Այս ի՞նչ է, մարդու հոտ կու գայ քիթիս, ո՞վ կայ այստեղ։
-Ե՛ս եմ այստեղ, -կ՚ըսէ Արան ու մարտի կը բռնուի դեւի հետ։ Արան կը հանէ իր թուրը եւ անանկ կը զարնէ, որ դեւին եօթ գլուխը թաւալգլոր գետնին կ՚ընկնէ։ «Ես դեռ կենդանի եմ, մէյ մըն ալ զարկ տուր, որ մեռանիմ», -կը խորամանկէ դեւը։ Բայց Արան կը յիշէր, որ դեւին երկու անգամ զարկել չէր կարելի, զի նորէն կենդանութիւն կ՚առնէր, ուստի նա միեւնոյն պատասխանը կու տայ, ինչ որ առաջինին ու բերդէն վար կը նետէ անոր լէշը։
Աղջիկը ուրախութենէն կը փաթթուի Արային՝ «Ես քու կինդ ըլլալ կ՚ուզեմ», -կ՚ըսէ։
- Այո՛, դուն իմ կինս պիտի ըլլաս, -կ՚ըսէ Արան։
Եւ աղջիկը Արային կը պատմէ, որ ինքը Նուարդն է՝ Պռոշ թագաւորին մէկ հատիկ աղջիկը։
-Ինծի Գեղանի Նուարդ կ՚ըսէին։ Շամիրամը իմանալով այդ, շատ նախանձեցաւ եւ ինծի այս դեւի միջոցով փախցրեց հօրս արքունիքէն։ Ո՛չ ես գիտեմ հօրս դրութիւնը, ո՛չ ալ հայրս ու եղբայրներս տեղեակ են իմ մասին։
Արան կը հարցնէ Պռոշ թագաւորի ով ըլլալը։
-Ուրեմն դուն չէ՞ս լսած Պռոշ թագաւորի թուրին մասին։ Դէ ինչ, լսէ՛ պատմեմ։ Իմ հայրը ունէր թուր մը, բայց ոչ սովորական։ Շատ կռիւներ յաղթած էր այդ թուրով, շատ արքաներ գիտցած են անոր զօրութիւնը։ Երբ հայրս տարիքն առած էր եւ ձեռքերը կը դողային, որոշում առաւ վերացնել այդ թուրը, որ եղբայրներիս մէջ խժդժութիւն չըլլայ թուրին տիրանալու հարցում։
Կը կանչէ նախ մեծ եղբօրս ու կ՚ըսէ, որ նա թուրը տանի ծովը նետի, ետքը ինքը կ՚օրհնէ ու նրան կը յանձնէ իր գահը։
Մեծ եղբայրս երբ որ կը հասնի ծով, թուրը անգամ մը փորձելու համար կը հանէ պատեանէն եւ ծովու եզերքի ժայռին կը զարնէ եւ պանիրի պէս կը կտրէ բեկոր մը։ Շատ կ՚ափսոսայ որ ասանկ եզակի թուր մը պիտի փոշիանայ եւ կը թաքցնէ այն ժայռի մէջ։ Սակայն կ՚երթայ հօրս կ՚ըսէ թէ թուրը ծով նետած է։
-Ի՞նչ պատահեց, երբ որ թուրը նետեցիր ծովուն մէջ, -կը հարցնէ հայրս։
-Ոչ մէկ բան չպատահեց-, կը պատասխանէ եղբայրս։
Հայրս կը հասկնայ որ եղբայրս սուտ կը խօսէ եւ կը պատուիրէ անոր՝ ետ բերել թուրը։ Այդու ետք նա միջնակ եղբօրս կը պատուիրէ ծովը նետել թուրը, սակայն միջնակ եղբայրս ալ կը մեղքնայ այն ու չի նետեր։ Հերթը կը հասնի կրտսեր եղբօրս։
Եղբայրս ձեռքը կ՚առնէ թուրը եւ ճամբայ կ՚ընկնի։ Ուրբաթ օր էր, ծովը հանդարտ, օդը ջերմ, բայց երբ կրտսեր եղբայրս թուրը ծովը կը նետէ, ծովն անմիջապէս կ՚ալեկոծուի, քամի կը բարձրանայ եւ սաստիկ փոթորիկ մը կը սկսի։ Եղբայրս շատ կը զարմանայ եւ հօրս կը պատմէ կատարուածը։
Հայրս կը հասկնայ որ եղբայրս ճիշդ կը խօսի եւ իսկապէս կատարած է իր պատուիրանը։ Նա գոհ կը մնայ եւ կ՚օրհնէ կրտսեր եղբայրս։
Իսկ այժմ ես անգամ չգիտեմ հայրս ո՞ղջ է արդեօք, թէ՝ ոչ։ Շա՜տ կարօտցած եմ հարազատներուս-, կ՚ըսէ Նուարդը եւ կ՚արտասուի...