Մանուկ Արմենակներու եւ Արմենուհիներու հարազատ սեփականութիւնը՝ Քամփ Արմէն, 175 օրուան դիմադրութենէ ետք վերջապէս Երեքշաբթի, 27 Հոկտեմբերին կալուածաթուղթի յանձնումով փոխանցուեցաւ Կէտիկփաշայի Աւետարանական Եկեղեցւոյ։ Սոյն եկեղեցւոյ կողմէ պատկան իշխանութիւններու թոյլտուութիւնով գնուած տարածքին վրայ մանուկներու աշխատութիւնով կառուցուած էր ճամբարի շէնքերը։ «Ակօս»ի հիմնադիր Հրանդ Տինք այդ մանուկներէն մէկն էր, որ կեանքի յաջորդող տարիներուն ալ կնոջ Ռաքէլի հետ միասին ծառայեց հոն ապաստանած որբերուն կամ, ալ չքաւոր ընտանիքներու զաւակներուն։ Տարիներ անց, պետութիւնը 1936-ի յայտարարագիրները պատրուակելով գրաւեց ճամբարը։ Եկեղեցւոյ օրինական պայքարը ապարդիւն մնաց եւ 1987-ին Վճռաբեկ Ատեանի վաւերացումով կալուածը ամբողջովին գրաւուեցաւ։
2011-ին Վաքըֆներու Օրէնքին մէջ կայացած փոփոխութիւններով սկսաւ փոքրամասնութիւններուն պատկանող եւ պետութեան կողմէ գրաւուած կալուածներու վերադարձուելու գործընթացը։ Այդ հանգրուանին Աւետարանական Եկեղեցին ալ դիմում կատարեց ընձեռուած առիթէն օգտուելու համար։ Սակայն իշխանութիւնները դիտել տալով թէ Քամփի գրաւումը տեղի ունեցած է օրինական վճիռով, մերժեցին ներկայացուած պահանջը։ Պետութիւնը կալուածը փոխանցած էր առաջին տիրոջ։ Որ ան ալ իր կարգին փոխանցեց ուրիշներուն։ Այսպէս ճամբարի վերջին սեփականատէր Ֆաթիհ Ուլուսոյ 6 Մայիս 2015-ին, քանդիչ սարքերով մտաւ տարածք եւ սկսաւ փլել երախաներու ձեռքերով կառուցուած շէնքը։ Այս լսելով ճամբարին գտնուած Թուզլա թաղի ՃՀՓ եւ ՀՏՓ կուսակցութեան շրջանային վարիչները փութացին ճամբար, իսկոյն տեղեակ պահելով նաեւ «Նոր Զարթօնք» շարժումի գործիչները։ Քանդիչ սարքերը վարող բանուորները իմանալով ճամբարի պատմութիւնը, հրաժարեցան աշխատելէ եւ դուրս հանեցին սարքերը։ Նոր Զարթօնք այդ պահուն որոշեց տարածքը գրաւել եւ այդ գրաւումի 175-րդ օրն էր որ իշխանութիւնները յօժարեցան երիտասարդներու կամքին եւ 27 Հոկտեմբերին Թուզլայի Քաղաքապետարանի մէջ կալուածի սեփականաթուղթը պաշտօնապէս յանձնեցին Կէտիկփաշայի Աւետարանական Եկեղեցւոյ փաստաբան Սեպուհ Ասլանկիլին։
Այժմ հայ ժողովուրդը կը յայտնուի նոր փորձադաշտի մը դիմաց, որն է հասարակութեան համար ողջունելի նախագիծով մը վերակենդանացնել ճամբարը, որպէսզի ան շարունակէ հիմնադիրներուն եւ ցարդ ծառայողներուն որդեգրած առաքելութիւնը։
