Թուրքիոյ ներկայ քաղաքական միջավայրի մէջ «հասարակութեան անվտանգութիւնը» պատճառաբանութեամբ կ՚արգիլուին հասարակական բնոյթի բոլոր պահանջները։ Այս ծիրէն ներս 29 Ապրիլ երկուշաբթի առաւօտ Ներքին գործոց նախարար Ալի Եէրլիքայա մամլոյ ժողով մը գումարելով յայտարարեց թէ բացարձակապէս պիտի չարտօնուի արհմիութիւններու Թաքսիմի հրապարակին վրայ կազմակերպելիք Մայիս 1-եան տօնակատարութիւնները։ Իր ելոյթին մէջ զգուշաբար ընտրուած բառերով փորձեց հանրահաւաքի մասնակիցներու ահաբեկիչ ըլլալու մասին տպաւորութիւն գոյացնել։
Միւս կողմէ գլխաւորութեամբ ՏԻՍՔ-ի զանազան արհմիութիւններ որոշած են անտեսել յարուցուած այս արգելքը եւ տօնակատարութիւնը գործադրել Թաքսիմի հրապարակին վրայ։
Այս կոչին ձայնակցած է նաեւ Ժողովրդահանրապետական Կուսակցութեան Իսթանպուլի նահանգապետը եւ կուսակցական շարքերը հրաւիրած ժամը 10.00-ին Սարաչհանէ մէկտեղուիլ, դէպի Թաքսիմ երթ կատարելու համար։
Նման կոչեր ըրած են զանազան ձախակողմեան կուսակցութիւններու կարգին Թուրքիոյ փաստաբաններու, ճարտարապետ եւ ճարտարագէտներու կաճառները։
ՏԵՄ կուսակցութիւնը եւս կ՚առարկէ նախարարի արգելքին եւ կը յայտարարէ թէ իրենք ալ Պեշիքթաշի մէջ մէկտեղուելով Բժիշկներու Կաճառի եւ Հասարակական Ծառայողներու Արհմիութեան նման պիտի ուղղուին դէպի Թաքսիմ։
Իբրեւ կանխամիջոց Թաքսիմի հրապարակը 29 Ապրիլէն սկսեալ շրջափակուած է երկաթեայ արգելակներով։ Իսկ 1 Մայիսի համար դէպի Թաքսիմ տանող բոլոր ճամբաները փակ են փոխադրամիջոցներու։ Իսթանպուլի մեթրօփոլիթանը նոյնպէս զանց կ՚առնէ Թաքսիմի նախորդող եւ յաջորդող քանի մը կայարանները, ժողովուրդին հրապարակ հասնիլը խափանելու միտումով։
Ինչ հետաքրքրական է, որ Ներքին Գործոց Նախարաութիւնը Թաքսիմի հրապարակը հանրահաւաքի կ՚արգիլէ պատճառաբանելով թէ ան երթեւեկութեան ամենակարեւոր խաչմերուկն է եւ կը խանգարուի ժողովուրդի ճամբորդելու իրաւունքը։
1 Մայիսի առաւօտուն քաղաքը այնպէս շրջափակած էին թէ, նոյնիսկ անկարելի կը դառնար տան դռնէն դուրս գալը անգամ։
Այս պայմաններու մէջ քիչ թիւով ցուցարարներ հազիւ թէ յաջողեցան նախապէս յայտարարուած հաւաքման վայրը հասնիլ։ Այստեղ անոնք եւս պաշարուեցան ահրելի թիւով ոստիկաններու կողմէ եւ այդ պաշարումը ճեղքել փորձողներէն 210 անձ իսկոյն բերման ենթարկուեցան ձեռնակապուած ձեւով։
Անվտանգութեան ծառայութիւնները այսպէսով յաջողեցան իրենց վստահուած պաշտօնին մէջ հսկայ քաղաքը արգելանոցի մը վերածելու գնով։
Նախապէս յայտարարուած էր երկու հաւաքման կէտ՝ Սարաչհանէ քաղաքապետարանի շէնքը եւ Պէշիքթաշ։ Զգալիօրէն քիչ էին այդ կէտերը հասնողները, որոնք մանր դիմադրութիւններով ետ մղուեցան ոստիկաններու կողմէ։ Ժողովրդահանրապետական կուսակցութեան նախագահը, որ նախապէս վճռակամօրէն կը խօսէր Թաքսիմ մտնելու մասին, հրաժարեցաւ այդ կամքէն եւ հեռացաւ հաւաքման կէտէն։
Նոյնպէս ՏԻՍՔ յայտարարեց թէ կը հրաժարին Թաքսիմ մտնելու կամքէն եւ արհմիութեան անդամներն ալ հետզհետէ նահանջեցին ոստիկանական պատնէշի դիմաց։
Այսպէս Էրտողանի կառավարութիւնը անգամ մը եւս պարտադրած եղաւ իր կամքը Թաքսիմի հրապարակը Մայիսի 1-եան տօնախմբութիւններու համար արգիլելու որոշումով։
Ըստ երեւոյթի այս տարի ալ յաջորդ տարի կրկին շարունակելու յոյսով անաւարտ մնացած է Մայիս 1-եան տօնակատարութիւնները Պոլսոյ մէջ։
