25 Ապրիլ Երկուշաբթի երեկոյեան Հայաստանեան հեռուստակայանները յանկարծ ընդհատեցին իրենց հաղորդումը տեղեկացնելու համար վերջին պահու զարգացումը։ Ժամը գիշերուայ 21։50-ի շուրջ Նոր Նորքի իններորդ զանգուածէն 15-րդ թաղամաս իր սովորական երթը կատարող 63 համար հանրակառքը պայթած էր Հալապեան փողոցի վրայ։ Հեռուստակայանները կը հաղորդէին նախնական տուեալները՝ ըստ որու տեղւոյն վրայ մահացած էին երկու անձ եւ 6 վիրաւորեալներն ալ հիւանդանոց փոխադրուած։ Առաջին հերթին ուշադրութիւնները սեւեռուած էին ինքնաշարժի թեքնիկական յատկութիւններուն։ Սակայն շուտով պարզուեցաւ որ ան կը բանէր ո՛չ թէ կազով այլ տիզէլ վառելանիւթով։ Նոյն գիշեր դէպքի վայր փութացող դատախազութիւնը կը խուսափէր ոչ յստակ տեղեկութիւններ հրապարակելէ։ Յաջորդ օր կատարուած քննութիւններով յայտնաբերուեցաւ բջջային հեռախօսի մը քարտը, որու ուսումնասիրութիւնով պարզուեցաւ տիրոջ ինքնութիւնը եւ հասցէն։ Հասցէի վրայ կատարուած քննութեան հետեւանքով բնակարանին մէջ գտնուեցան «թրոթիլ» տեսակի պայթուցիկ նիւթ, պայթուցիչ սարքեր եւ տարբեր տեսակի ելեքտրասարքեր։
Քննիչներու համաձայն դէպքը ահաբեկչական բնոյթ չի կրէր եւ պայթուցիկ սարքերը պիտի օգտագործուէին ընտանեկան հաշիւ մը մաքրելու համար։
