ՎԱՐԴԱՆ ԷՍԴՈՒԳԵԱՆ
estukyan@gmail.com
Դարձեալ խիստ պայմաններով գործող բանտ փոխադրուած Սեւան Նշանեանի դէմ ճնշումները կը շարունակուին «կարգապահութեան պատիժ» սահմանումով։ Այսպէս ան անցեալները ենթարկուած էր 11 օր տեւողութեամբ առանձնախցիկի բանտարկութեան։ Այս պատիժին հիմք հանդիսացած էր Նշանեանի համացանցի հաղորդակցութիւն ապահովող գործիքով մը բռնուիլը։ Ծանօթ մտաւորականի իրաւապաշտպաններ՝ Մուրատ Աքչը եւ Կիւլչին Ավշար Սէօքէի դատախազին ներկայացուցին իրենց առարկութիւնը։ Սակայն դատախազը մերժեց այս առարկութիւնը եւ պատիժը վաւերացուց։
Նշանեանի դէմ կատարուեցաւ երկրորդ մեղադրանք մը, այս անգամ թիկնապահները կաշառելու ուղղութեամբ։ Իրաւապաշտպանները այս երկրորդ մեղադրանքին դէմ ալ առարկութիւն ներկայացուցին այս անգամ Սէօքէի Երկրորդ Եղեռնադատ Ատեանի Նախագահութեան։ Այս առարկութիւնն ալ կը կայանար անհիմն մեղադրանքի վրայ։ Դատարանը համակարծիք եղաւ իրաւապաշտպաններու դիմումին եւ անտեսեց կաշառքի պնդումը։ Բայց դարձեալ վաւերացուց վեցօրեայ առանձնախցիկի պատիժը, պնդելով որ Նշանեան նախատած է բանտի պաշտօնէութիւնը։
Փաստաբանները անհաւատալի կը գտնեն այս որոշումը, քանի որ նախ եւ առաջ նախատինքի վերաբերեալ բողոք մը գոյութիւն չունի։ Չէ լսուած նաեւ մեղադրեալի պաշտպանութիւնը։ Այս պայմաններու տակ փաստաբանները կը յայտնեն թէ տնօրինուած պատիժը օրինական չէ։ Դատարանը այսպէսով ոտնակոխած կ՚ըլլայ թէ ներքին իրաւական համակարգը եւ թէ ԵՄԻԱ-ի վճիռները։
