Իսթանպուլի 14-րդ Եղեռնադատ Ատեանը Հրանդ Տինքի ոճիրին հետ առնչուած միացեալ դատավարութեան առաջին նիստի թուականը ճշդած է 19 Ապրիլին։ Վճռաբեկ Ատեանի 5-րդ պատժական բաժինի որոշումով ոճրագործութիւնը եւ 26 ամբաստանեալներով պետական պաշտօնեաներու այդ ոճիրին մէջ ունեցած դերակատութիւնը քննող երկու թղթածրարները միացուած եւ դատելու պաշտօնը յանձնուած էր 14-րդ Եղեռնադատ Ատեանին։
Այսպէս դատարանը որոշեց 19, 20, 21 Ապրիլ թուականներուն Չաղլայանի Արդարութեան Պալատի մեծ սրահին մէջ դատական նիստ գումարել։ Մինչ այդ կը շարունակուի ձերբակալուած ամբաստանեալներ Ալի Ֆուաթ Եըլմազէր, Ռամազան Աքյիւրէք, Էրճան Տէմիր, Մուհիտտին Զէնիթ եւ Էօզքան Մումճիի բանտարկութիւնները։
Միւս կողմէ Ներքին Գործոց Նախարար Էֆքան Ալա Խորհրդարանի մէջ պատասխանեց Ժողովուրդներու Ժողովրդավարութեան Կուսակցութեան պատգամաւոր Կարօ Փայլանի ուղղած հարցումին։ Փայլան հարցուցած էր թէ ինչու համար չէ պաշտօնազրկուած Ապահովութեան Ընդհանուր Տնօրէնութեան լրաքաղութեան բաժնի պետ Էնկին Տինչը։ Նախարարը նշեց որ Էնկին Տինչ ոճիրէն առաջ արդէն բաժնուած էր այդ պաշտօնէն։ «Մեր գնահատումով թերացում մը չենք տեսած, եթէ տեսնէինք արդէն այդ պաշտօնին չէր ըլլար»։ Իսկ Կարօ Փայլան «Պիանէթ» լրատու գործակալութեան ըսաւ թէ Տինչ կ՚ամբաստանուի ոճիրի մասին լրատուութիւնը իր պետերուն չփոխանցելով։
