Ն. Ա. Տ. Սահակ Բ. Պատրիարք Հայրը Սուրբ Աստուածածնի Վերափոխման Տաղաւարին առթիւ Վաքըֆգիւղի Սուրբ Աստուածածին Եկեղեցւոյ անուան տօնախմբութեան արարողութեանց նախագահելու համար 10 Օգոստոս 2023, Հինգշաբթի առաւօտուն Գաւազանակիր Արժ. Տ. Շիրվան Քհնյ. Միւրզեանի ուղեկցութեամբ օդային ճամբով մեկնեցաւ Ատանա։
Նորին Ամենապատուութիւն Ատանայի Շաքիր Փաշա Օդակայանի պատուոյ սրահին մէջ դիմաւորուեցաւ Հաթայի Եկեղեցեաց Հոգեւոր Հովիւ եւ Գաւառի Համայնքներու Հոգեւոր Տեսուչ՝ Արժ. Տ. Աւետիս Քհնյ. Թապաշեանի եւ Իսքենտէրունի Ս. Քառասուն Մանկունք Եկեղեցւոյ Ծխական Խորհուրդի Ատենապետ՝ Եուսուֆ Թապաշեանի կողմէ։
Պատրիարք Հայրը եւ հետեւորդները ցամաքի ճամբով անցան Մերսին, ուր քաղաքի Լատին Կաթողիկէ Եկեղեցւոյ մուտքին դիմաւորուեցան եկեղեցւոյ Հոգեւոր Հոգիւ Հայր Ռօշան Վարդապետի եւ քաղաքի Հայ համայնքէն Շահին Քըսատուրի կողմէ։
Պատրիարք Հայրը ժամը 14.00-ին քաղաքավարական այցելութիւն տուաւ Մերսինի Մայր քաղաքապետ Վահապ Սէչէրի։
Մեծայարգ քաղաքապետը բարի գալուստ մաղթեց մեր Հոգեւոր Պետին եւ ուրախութիւն յայտնեց սոյն այցելութեան համար։ Նորին Ամենապատուութիւնը, շնորհակալութիւն յայտնեց ընծայուած ջերմ ընդունելութեան համար։
Պատրիարք Հայրը իր հետեւորդներով ժամը 15.00-ին այցելեց Մերսինի Սրբոց Միքայէլ եւ Գաբրիէլ Հրեշտակապետաց Յոյն Ուղղափառաց Եկեղեցին, ուր դիմաւորուեցաւ Անտիոքի Պատրիարքութեան Փոխանորդ՝ Հոգշ. Տ. Փաւլոս Վարդապետ Օրտուլուօղլուի, եկեղեցւոյ հովիւներ՝ Արժ. Տ. Տ. Ճան Տէլլիւէր եւ Իսպիր Թէյմուր քահանաներու եւ եկեղեցւոյ վարչութեան ատենապետ Ճան Արաթի կողմէ։ Նորին Ամենապատուութիւնը հոգեւոր երգերով առաջնորդուեցաւ եկեղեցի, ուր կատարուեցաւ աղօթասացութիւն։ Ապա եկեղեցւոյ սրահին մէջ ի ներկայութեան հաւատացեալներու Հայր Փաւլոս Վարդապետ յանուն հոգեւորական դասուն, եկեղեցւոյ վարչութեան եւ հաւատացեալ ժողովուրդին բարի գալուստ մաղթեց Նորին Ամենապատուութեան եւ շնորհակալութիւն յայտնեց, անոր համար որ Հայոց Պատրիարքութիւնը առաջին իսկ մէկ օրէն աղէտեալներու կողքին կանգնած էր։ Հաղորդեց Անտիոքի Յունաց Յովհաննէս Ժ. Պատրիարքի յատուկ ողջոյնները եւ շնորհակալութիւնները յայտնեց։
Յոյն Ուղափառաց Եկեղեցիէն յետոյ մեր Հոգեւոր Պետը իր հետեւորդներով այցելեց քաղաքի Լատին Կաթողիկէ Եկեղեցին, ուր կատարուած կարճ աղօթասացութենէն յետոյ եկեղեցւոյ սեղանատան մէջ մէկտեղուեցաւ քաղաքի Հայ համայնքի անդամներուն հետ։
Ջերմ հանդիպումի ընթացքին հաւատացեալներ առիթը ունեցան իրենց հոգեւոր պետին հետ զրուցելու եւ լուսաբանուելու կրօնական նիւթերու շուրջ, որուն համար շնորհակալութիւն յայտնեցին, որ ամէն առթիւ իր հովուապետական ներկայութեամբ կը մխիթարէր զիրենք։ Նորին Ամենապատուութիւնը շնորհակալութիւն յայտնեց ընծայուած որդիական ջերմ ընդունելութեան համար եւ իր հայրական օրհնութիւնը տուաւ եկեղեցւոյ Հոգեւոր Հոգիւ Հայր Ռօշան Վարդապետի եւ ներկայ Հայ համայնքի անդամներուն։
Ն.Ա.Տ.Սահակ Բ. Պատրիարք Հայրը պաշտօնական այցելութիւններու ծիրէն ներս 11 Օգոստոս 2023-ին քաղաքավարական այցելութիւն տուաւ Մերսինի Կուսակալ Ալի Համզա Փեհլիվանի։ Պատրիարք Հօր կ՚ընկերանային Գաւառի համայնքներու տեսուչ՝ Արժ. Տ. Աւետիս Քհնյ. Թապաշեան, գաւազանակիր՝ Արժ. Տ. Շիրվան Քհնյ. Միւրզեան եւ Իսքենտերունի Ծխական Խորհուրդի ատենապետ՝ Եուսուֆ Թապաշեան։
Մեծայարգ կուսակալը, որ անցեալ տարի ծանօթացած էր Նորին Ամենապատուութեան հետ, իր գոհունակութիւնը յայտնեց, որ այս տարի եւս հանդիպում ունեցած էր։ Նորին Ամենապատուութիւնը շնորհակալութիւն յայտնեց ընծայուած ջերմ ընդունելութեան համար եւ յաջողութիւն մաղթեց մեծայարգ կուսակալին իր գործունէութեանց մէջ։
Կուսակալութեան պաշտօնարանէն բաժնուելէ յետոյ ցամաքի ճամբով Մերսինէն մեկնեցաւ դէպի Հաթայ։
Ամեն. Ս. Պատրիարք Հայրը ժամը 16.00-ին այցելեց Հաթայի Մայր Քաղաքապետութեան պաշտօնարանը։ Մայր Քաղաքապետ Տոց. Տքթ. Լիւթֆի Սավաշ պաշտօնական անակնկալ հանդիպումի մը համար քաղաքէն դուրս կը գտնուէր, հետեւաբար Նորին Ամենապատուութիւնը ընդունուեցաւ Մայր Քաղաքապետի Փոխանորդ՝ Ատնան Էօզքայայի կողմէ։
Պատրիարք Հայրը իր հետեւորդներով այցելեց Առսուզի Ս. Յովհաննէս Ուղղափառաց Եկեղեցին, որ երկրաշարժէն մեծապէս վնասուած էր։ Եկեղեցւոյ մուտքին Նորին Ամենապատուութեան բարի գալուստ մաղթեցին Իսկենտերունի եւ Առսուզի Սուրբ Եկեղեցեաց Երէց՝ Արժ. Տ. Տիմիթրի Եըլտըրըմ, Եկեղեցւոյ ծխական խորհուրդի ատենապետ Ճէմիլ Թուրան եւ խորհրդականներ։ Նորին Ամենապատուութիւնը ի տես եկեղեցւոյ աւերեալ վիճակին իր ցաւը յայտնեց եւ հայրական օրհնութեամբ մխիթարեց ներկայ հաւատացեալները եւ յիշեցուց, որ աղօթակից էր իրենց այս դժուարին պահերու յաղթահարման համար։ Վերջին օրհնութեան աղօթքը արտասանելէ յետոյ մեկնեցաւ։
Նոյն գիշեր Ամեն. Ս. Պատրիարք Հայրը Իսկենտերունի Ծխական Խորհուրդի անդամներուն հետ համախմբուեցաւ սիրոյ սեղանի շուրջ եւ երկրաշարժէն յետոյ փոքր վնասներ կրած բնակարաններու վերանորոգութեան համար ծխական խորհուրդի ատենապետ Եուսուֆ Թապաշի եւ խորհրդականներուն տարած վճռական աշխատանքները գովեց եւ իրենց յաջողութիւն մաղթեց։
Նորին Ամենապատուութիւնը եւ հետեւորդները գիշերեցին Իսկենտերունի Լատին Կաթոլիկ Վանքին մէջ։
Ամեն. Ս. Պատրիարք Հայրը 12 Օգոստոս, Շաբաթ, ժամը 10.30-ին վանքի սեղանատան մէջ հանդիպում ունեցաւ քաղաքի հայ համայնքի անդամներուն հետ։ Նորին Ամենապատուութիւնը յետ երկրաշարժի երկրորդ հովուապետական այցելութիւնն էր որ կը շնորհէր։ Առաջինին ցաւ զգացած էր, քանի որ համայնքի բազմաթիւ անդամներ երկրաշարժի պատճառով այլ քաղաքներ փոխադրուած էին։ Այս անգամ իր գոհունակութիւնը յայտնեց, որ շատեր վերադարձած էին եւ առիթը ունեցած էր իրենց հետ զրուցելու։ Ամեն. Ս. Պատրիարք Հայրը իր մխիթարական խօսքերով յայտնեց, թէ Պատրիարքական Աթոռը նեցուկ կը կանգնէր իրենց։ Մեր հոգեւոր պետը հայրական խօսքերով գովեց Տ. Աւետիս Քահանան եւ ծխական խորհուրդի ատենապետ՝ Եուսուֆ Թապաշը, որոնք երկրաշարժի պատահած առաջին իսկ մէկ օրէն յանձն առած էին աշխատակցիլ Պատրիարքարանի հետ կատարուած բոլոր աշխատանքներուն։ Այս հանդիպումին ներկայ համայնքի անդամները առիթ ունեցան արտայայտուելու եւ իրենց որդիական սէրը յայտնելու Նորին Ամենապատուութեան։
Պատրիարք Հայրը Իսկենտէրունէն բաժնուելով ուղղուեցաւ դէպի Սամանտաղ, այն գաւառակը որուն սահմաններուն մէջ կը գտնուի Վաքըֆգիւղը։
Նորին Ամենապատուութիւնը, ժամը 15.30-ին այցելեց Սամանտաղի Գաւառապետ՝ Մուրատ Աքսույի։ Գաւառապետարանի մուտքին մեր հոգեւոր պետն ու հետեւորդները դիմաւորուեցան Վաքըֆգիւղի Ծխական Խորհուրդի Ատենապետ՝ Ճէմ Չափարի, Վաքըֆգիւղի Գիւղապետ՝ Պերճ Քարթունի եւ Կարպիս Քուշի կողմէ։ Սիրալիր մթնոլորտի մէջ կայացած հանդիպումի ընթացքին մեր Հոգեւոր Պետը յաջողութիւն մաղթեց յարգելի գաւառապետին, որ կը պաշտօնավարէր երկրաշարժի հետեւանքով ծանր աւերներ կրած շրջանի մը մէջ։
Ամեն. Ս. Պատրիարք Հայր գաւառապետարանէն յետոյ իր հետեւորդներով այցելեց Սամանտաղի Քաղաքապետ՝ Րէֆիք Էրեըլմազի։ Մեր Հոգեւոր Պետը նոյնպէս ընդգծեց ծանր աւերներ կրած շրջանի մը մէջ պաշտօնավարելու դժուարութիւնները, մանաւանդ որ տակաւին կը շարունակուէր փլուզումները։ Այս նեղ պայմաններու մէջ յօգուտ քաղաքի իրագործելի շինարարական աշխատութեանց մէջ քաղաքապետին յաջողութիւն մաղթեց։
Քաղաքապետարան այցելութենէն յետոյ Ամեն. Ս. Պատրիարք Հայրը հասաւ Վաքըֆգիւղ, ուր կը տիրապետէր ապրուած երկրաշարժի աւերուածութեան մթնոլորտը, այս առումով տհոլ ու զուռնայով կատարուած աւանդական խանդավառ դիմաւորութիւնը տեղի չունեցաւ։ Գիւղացիներ սիրով շրջապատեցին Նորին Ամենապատուութիւնը, որ այցելեց Ս. Աստուածածին Եկեղեցին, որուն զանգակատունը, աւագ սեղանը եւ մկրտարանը աւերուած էր։ Պատրիարք Հայրը տեսաւ գիւղի եկեղեցւոյ պարտէզին մէջ հաւաքուած կիները, որոնք հարիսայի ցորենը կը մաքրէին։ Այս տեսարանը մխիթարական որակեց Պատրիարք հայրը, քանի գիւղացիներ կապուած կը մնային իրենց աւանդական սովորութիւններուն։
Ժամը 18:30-ին եկեղեցւոյ պարտէզին մէջ ժողովուրդի մասնակցութեամբ կատարուեցաւ երեկոյեան ժամասացութիւն եւ աղօրհնէք։
Ժամը 23.00-ին Նորին Ամենապատուութիւնը յետ կատարուած աղօթքի, բոցավառեց հարիսայի կաթսաներու կրակները։
Սուրբ Կոյս Մարիամ Աստուածամօր Վերափոխման տաղաւարի Սուրբ Պատարագը մատուցուեցաւ Մեսրոպ Բ. Պատրիարք Մշակոյթի Կեդրոնի սրահին մէջ։ Ժամը 10.00-ին սկսած Սուրբ Պատարագը մատոյց Արժ. Տ. Աւետիս Քահանայ Թապաշեան։ Ս. Սեղանին սպասարկեցին Բրկ. Ալէն Քուշ եւ Բրկ. Եուսուֆ Թապաշ ուրարակիր դպիրները։ Երգեցողութիւնները վարեց Արժ. Տ. Շիրվան Քահանայ Միւրզեան։
Նախ քան Տէրունական Աղօթքը քարոզեց Նորին Ամենապատուութիւնը անդրադառնալով Ս. Աստուածածնի վերափոխման իմաստին, շեշտեց որ կը դիմենք իր բարեխօսութեան։ Գիւղի ժողովուրդին թելադրեց որ միասնականութեան ոգի դրսաւորեն։ Յիշեցուց որ օրհնութիւնը կու գար հոն, ուր սիրոյ միութեան ներկայութիւնը զգալի կը դառնար։ Քարոզի վերջաւորութեան ընդգծեց Քրիստոսի խօսքին կարեւորութիւնը։ Յիշեցուց, որ Քրիստոս նոր պատուիրան տուած էր իր առաքեալներուն ըսելով. «ինչպէս ես ձեզ սիրեցի, դուք ալ սիրեցէք զիրար։ Եթէ դուք զիրար սիրէք՝ ատով ամէնքը պիտի գիտնան թէ դուք իմ աշակերտներս էք» (Յովհաննէս, 13.34-35)։
Սուրբ Պատարագի աւարտին կատարուեցաւ խաղողօրհնէք, ապա հարիսայի օրհնութիւն եւ պաշտօն գիւղի վախճանեալ հոգեւոր սպասաւորներուն եւ գիւղացիներուն հոգւոցն ի հանգիստ։
Եկեղեցական արարողութեանց աւարտին սարքուեցաւ Սիրոյ Սեղան, որմէ յետոյ Նորին Ամենապատուութիւնը մեկնեցաւ դէպի Ատանա եւ օդային ճամբով վերադարձաւ Իսթանպուլ՝ իր Աթոռը։
